24 dekabr 1865-ci ildə altı cavan, şuluq zabit ABŞ-ın Tennesi ştatındakı balaca Pülasko şəhərinin məhkəmə binasında yığışıb, gizli bir təşkilat yaratmaq qərarına gəldilər. O vaxt bu altı zabitin heç bir konkret məqsədi yox idi. Onlar, sadəcə olaraq, Vətəndaş Müharibəsində iştirak etdiklərinə görə müharibədən sonra bəzi hüquqlarından məhrum olmuşdular. Eləcə bekarçılıq idi. Yeni yaradılmış təşkilatın adı Ku-Kluks-Klan (KKK), yəni "çevrə klanı" və ya "çevrə birliyi" oldu. Uzun müddət bu gənclər eləcə ağ cübbə geyinərək, ağ örtülü atların belinə minib, gecələr küçələrə çıxaraq, qonşuları qorxutmaqla məşğul oldular. Çoxları bu ağ atlıların öldürülmüş əsgərlərin ruhları olduğunu düşünürdü, "narahat əsgər ruhları" barədə əfsanələr yaranırdı. KKK üzvlərinin sayı isə durmadan artırdı və buna görə də at minib, qonum-qonşu qorxutmaq kimi bəsit məşğuliyyət klan üzvlərini bezdirməyə başladı. Dördillik müharibə görmüş gənclik üçün əyalət hoqqaları maraqsız idi. Təzə, iti hisslər yaşamaq istəyi güc gəlirdi. Və KKK zənciləri hədəfə aldı. Çünki müharibədən sonra işsiz qalan zəncilərin çoxu ayrı-ayrı dəstələrə bölünərək, quldurluq etməyə başlamış və "özünü müdafiə edən ağlar" qorunmaq üçün KKK ilə ittifaq qurmuşdular. Tarix ağların KKK ilə nə vaxt ittifaq bağladığı barədə susur. Amma bu dəqiqdir ki, ittifaqın məqsədi qaraların dərsini vermək və əl-ayağını yığışdırmaq məqsədi güdürdü. Beləliklə, Ku-Kluks-Klanın elə bu gün də aktual olan əsas məqsədi – qatı irqçilik meydana gəldi.

Klançılar qaradərililərə təsir etmək üçün bir çox hoqqalara əl atırdılar. Məsələn, qaradərilinin birinin evinin yanında dayanan ağ cübbəli atlı ev sahibini çağırıb, ondan su istəyirdi. Zənci qurudulmuş boş balqabağın içində gətirdiyi suyu ona verirdi. Atlı suyu birnəfəsə boşaldıb, yenə istəyirdi. Axırda zənci dolu vedrəni gətirirdi. Atlı vedrəni də birnəfəsə başına çəkib, yenə su istəyirdi. Onlarla litr su boşaltdıqdan sonra isə dərindən nəfəs alıb, deyirdi: "Mən Şilo yaxınlığında öldürüləndən bəri su içməmişdim. Cəhənnəmdə isə adam yaman susayır!" Fırıldaq isə sadə idi. Su başlıqdakı ağız yerinə bərkidilmiş borucuğa tökülür, oradan da atın belinə bağlanmış tuluğa axırdı. Olan dəhşətə gəlmiş zənciyə olurdu. Ağ cübbəli atlı zənciyə təşəkkür edib gedəndən sonra xurafatçı qaradərililərin arasında növbəti qorxulu bir əfsanə yaranırdı. Beləliklə, KKK real qüvvəyə çevrildi. Onları görən zəncilər qaçıb gizlənir, evlərinə girib, qapıları kilidləyirdilər. Onların sayı durmadan artırdı. Amma 1866-cı ildə zəncilərdən biri atəş açaraq, ağ cübbəli klançını yaralayandan sonra klanın mifi bir qədər dağıldı. Bundan sonra klançıların çoxu ağ cübbələri qırmızı və qara cübbələrə dəyişdilər. Bununla belə, KKK üzvlərinin geyimləri indi də unudulmayıb. Məşhur Nirvana qrupunun «Heart-Shaped Box» klipindəki (http://www.youtube.com/watch?v=n6P0SitRwy8) balaca qızın əynində həmin geyimi görmək olar.