Zaman ötür, fəsillər dəyişir, illər əsrlərə, əsrlər minilliklərə çevrilir, tarixə dönür. Bu illər ərzində bir çox tarixi hadisələr baş verir. Bəzi tarixi hadisələr müəyyən dövrdən sonra yaddan çıxır, unudulur. Lain elə tarixi hadisələr var ki, heç vaxt unudulmur. Qərinələr ötsə, nəsillər bir-birini əvəz etsə belə öz qanları ilə dastan yazan şəhidlərimiz, torpaq uğrunda canından keçən oğullar heç vaxt unudulmur.
Torpaq, uğrunda ölən varsa, Vətəndir. Vətən, urunda ölən varsa, Şəhiddir. Ən ali, müqəddəs və şərəfli olan Şəhidlik zirvəsinə yüksələnlər daim qəlblərdə yaşayırlar.
II Qarabağ müharibəsi tarixini yazan qəhrəman Şəhidlərimizdən biri də cəsur döyüşçü, polkovnik-leytenant Əfqan Abdurahmanovdur.
Vətənin qüruru, vüqarı olan Əfqan Ağasəf oğlu Abdurahmanov 1976-cı il mayın 25-də Bakı şəhərində anadan olub. O, 1982-1993-cü illərdə Binəqədi rayonunda Vahid Əzizov adına 30 nömrəli tam orta mətəbdə təhsil alıb. 1995-1997-ci illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olduqdan sonra, 1997-2001-ci illərdə Heydər Əliyev adına Azərbaycan Ali Hərbi Məktəbində təhsil alıb. 2001-2002-ci illərdə isə Azərbaycan Silahlı Qüvvələrinin Təlim və Tədris Mərkəzində təcrübədə olduqdan sonra isə 2002-ci ildən Azərbaycan Silahlı Qüvvələrinin sıralarında xidmətə başlayıb. Qulluq etdiyi müddətdə Türkiyə, Çexiya və Çində Müdafiə Nazirliyinin Sərəncamı ilə müxtəlif kurslara, hərbi təlimlərə qatılıb.
26 illik hərbi xidmət dövründə dəfələrlə yüksək döyüş hazırlığına, nizam-intizama və qüsursuz xidmətinə görə hərbi hissə komandiri tərəfindən fəxri fərmanla, Azərbaycan Respublikasının Prezidenti İlham Əliyev tərəfindən "Qüsursuz xidmətə görə" 3-cü və 2-ci dərəcəli medalları ilə təltif edilib.
Aprel döyüşləri zamanı Əfqan Goranboy rayonunun Baranbat meşəsi adlanan ərazidə xidmət edib. Azərbaycan hərb tarixinin qızıl səhifəsi olan Aprel döyüşlərində zabit Əfqan Abdurahmanovun rəhbərlik etdiyi hərbçilərimizin də böyük töhfəsi olub.
Azərbaycan Ordusunun polkovnik-leytenantı olan Əfqan Abdurahmanov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsinin ilk günlərində işğaldan azad edilən ərazilərimizdən biri olan Murov dağı silsiləsindəki zirvələrdən birinə bayrağımızı sancanlardan olub. Zirvənin azad olunmasına Əfqan Abdurahmanov rəhbərlik edib.
Bu əməliyyat nəticəsində Azərbaycanın işğal olunmuş ərazilərini Ermənistanla birləşdirən hərbi əhəmiyyətli Vardenis-Ağdərə avtomobil yolu vizual, eləcə də atıcı silahların və artileriya vasitələrinin atəş nöqtələri nəzarətə götürülüb. Əldə edilən hərbi üstünlük Ermənistandan əlavə hərbi yüklərin işğal altında olan Kəlbəcər və Ağdərə istiqamətindəki marşrutla daşınmasının qarşısını almağa imkan verib.
Əməliyyatın uğurlu keçməsində Əfqan Abdurəhmanov və onun döyüşçülərinin böyük rolu olub. Zirvəyə bayraq sancan Əfqan Abdurəhmanov həyatının ən xoşbəxt gününü yaşayıb.
Daha sonra Suqovuşana kimi olan kəndlər azad edilib. Suqovuşan kəndinin azad edilməsindən öncə Əfqan Abdurahmanovun dəstəsi mühasirəyə düşmək təhlükəsi ilə qarşılaşıb. Ac-susuz qalan hərbçilərimiz hər cür çətinliyə dözüb, yarpaqların üstündəki şehləri toplayaraq içiblər, amma ruhdan düşməyiblər. Çünki onların Əfqan kimi peşəkar komandiri vardı, ona inanıblar. Hərbçilərimiz bu çətinliyin də öhdəsindən gəliblər. Əfqan hərbçilərimizlə birlikdə Mubariz İbrahimovun şəhid oldugu postu azad edib. Suqovuşan istiqamətində düşmənin ağır məğlubiyyətə uğradılmasında, tutduqları mövqelərdən və ərazinin vacib sahələrindən geri çəkilməyə məcbur edilməsində Əfqan Aburəhmanov və tabeçiliyində olan əsgərləri də yaxından iştirak edib. Ermənistan ordusunun müxtəlif istiqamətlərdə hərəkət edən hərbi kolonları bölmələrimiz tərəfindən dəqiq atəşlə məhv edilib. Düşmən Suqovuşanı itirilməsi ilə heç cür barışa bilmir, strateji cəhətdən önəmi olan yaşayış məntəqəsini geri almaq məqsədilə bir neçə dəfə əks-hücuma keçir, lakin ordumuz tərəfindən hücumun qarşısı alınıb, düşmən çoxsayda canlı qüvvə və texnika itirərək geri çəkilməli olub.
Qarşıda isə Ağdərə vardı. Oktyabrın 10-da Əfqan Abdurahmanovun rəhbərliyi ilə hərbçilərimiz Ağdərə ətrafında yerləşən yüksəkliklərdən birinin düşməndən təmizlənməsi əməliyyatını həyata keçirib. Artıq ağır döyüşlər gedir, düşmən xeyli sayda canlı qüvvəsini itirib. Polkovnik-leytenanta bildirilir ki, 20 dəqiqədən sonra humanitar atəşkəs qüvvəyə minir, hücum əməliyyatı dayandırılsın. Əfqan Abdurahmanov əmrə tabe olur və hücumu dayandırır. Düşmən üçün isə atəşkəs bir bəhanə, xəbis niyyətini həyata keçirmək məqsədilə yaranmış imkan idi. Dəfələrlə olduğu kimi bu dəfə də mövqelərimiz atəşə tutulub. Tankın partlaması nəticəsində yaranan partlayış dalğası Əfqan Abdurahmanovu kənara atıb. Alnı yaxınlıqdakı qayaya dəyməsi nəticəsində şəhadətinə qovuşub. Döyüş zabiti, qələbə arzusu ilə yaşayan, həmyerlisi Polad Həşimovun intiqamını alacağına söz verən Əfqan Abdurahmanov qəhrəmancasına həlak olub.
Polkovnik-leytenant Əfqan Abdurahmanov Qəbələ rayonunun Əmirvan kəndində dəfn olunub.
Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Respublikasının Prezidenti İlham Əliyevin 2020-ci il 09 dekabr tarixli Sərəncamına əsasən Əfqan Abdurahmanova "Vətən Müharibəsi Qəhrəmanı" adı verilib.
Azərbaycanın ərazi bütövlüyünün təmin edilməsi uğrunda döyüş borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin 2020-ci il 15 dekabr tarixli Sərəncamına əsasən Əfqan Abdurahmanov ölümündən sonra "Vətən uğrunda" və 2020-ci il 29 dekabr tarixli Sərəncamına əsasən "Suqovuşanın azad olunmasına görə" medalları ilə təltif edilib.
Vətən uğrunda ölüm həyatın davamıdır. Şəhidimiz şəhadəti ilə Ölümsüzlüyə imza atdı. VƏTƏN səni heç zaman unutmayacaq, polkovnik-leytenant Əfqan Abdurahmanov! Ruhunuz qarşısında baş əyirik!
Almaz Yaşar
"AY MEDİA COMPANY"
