Bu gün Azərbaycan tarixində bəlkə də çoxlarının əhəmiyyətini hələ də tam dərk etmədiyi ən parlaq günlərdən biridir.
XX əsrin rəngarəng hadisələri sırasında müstəmləkəçilik mərəzindən əziyyət çəkən və ondan xilas olmaq, milli müstəqillik əldə etmək üçün mübarizə aparan Azərbaycan xalqı üçün 18 oktyabr təqvimi tariximizə qızıl həriflərlə yazılan çox önəmli bir səhifədir.
Xarici və daxili irticanın tüğyan etdiyi dönəmdə, sovet imperializminin dağıntıları altından çıxmış quduz Rusiyanın əsas dayağı olan yerli əlaltıları - ənənəvi milli satqınlarımızın bilavasitə vasitəçiliyi və anti-milli fəaliyyətləri sayəsində Azərbaycanda öz təsirini qoruyub saxlamaq, hər vəclə imperiya maraqlarını bu regionda hifz etmək məqsədi güddüyü həllədici məqamda baş verirdi bütün bunlar.
1918-ci il mayın 28-də Milli Müstəqilliyimiz elan olunduqdan 83 il sonra tarix yenidən təkrar olundu.
1991-ci il... Meydanlar kükrəyirdi. Azadlığın yaxınlaşdığını duyan xalq öz əzəli və əbədi arzusuna qovuşmaq, həmin tarixi anı tezləşdirmək üçün hər şeyə hazır idi. Bu xalq meydan hərəkatında bərkimiş, Yanvar qırğınını görmüşdü. İmperiyanın tanklarıda artıq azadlığa gedən yolun qarşısını kəsməyə qadir deyildi. Özünün istiqlal mübarizəsində neçə-neçə şəhid və qurbanlar vermiş Azərbaycan addım-addım, inamla müstəqilliyə doğru gedirdi.
1991-ci ilin 18 oktyabr günü uzun-uzadı qızğın müzakirələrdən sonra "Azərbaycanın dövlət müstəqilliyi haqqında Konstitusiya Aktı" qəbul olundu. Bu müzakirələr işə başlayan Ali Sovetin növbədənkənar sessiyasında 4 gün davam etdi.
Həmin vaxt Aktın lehinə Ali Sovetin 360 deputatından 231-i səs verir, qalanlar ya sessiyaya qatılmayıb, ya da onun əleyhinə səs verməyiblər.
Ancaq Azərbaycan xalqının müstəqillik istəyinə 1991-ci ildə parlamentdə 43 deputat səs vermişdir. Məhz həmin deputatlar
Azərbaycanın yeni tarixinə "İstiqlalçı deputatlar" adı ilə daxil olublar.Təəssüflər olsun ki, onların bir çoxu həyatda yoxdur. Ruhları xoş olsun...
Tarix dəfələrlə sübut edib ki, müstəqilliyi qoruyub saxlamaq onu itirməkdən qat-qat çətindir. Gərək sınaqlara hazır olasan, hər bir əziyyətə və çətinliyə dözməyi bacarasan. Tale elə gətirdi ki, Azərbaycan bir əsrdə iki dəfə müstəqillik əldə etmək, özünün suveren dövlətini yaratmaq imkanı qazandı. Əfsuslar olsun ki, birinci imkan xarici müdaxilə, daxili çəkişmələr və beynəlxalq təminatın olmaması səbəbindən itrildi. 1918-ci ildə qurulmuş Azərbaycan Xalq Cümhuriyyəti cəmi 23 ay yaşadı. İkinci tarixi imkan bir də 70 il sonra yarandı.
Gəlin bu dəfə tarixdən ibrət dərsi alaq və uğursuzluqlarımızdan doğru nəticə çıxararaq müqəddəs olan milli müstəqilliyimiz üçün yarana biləcək hər cür təhlükəni dəf etməyə hazır olaq.
Müstəqillik gününüz mübarək!
Elnur Xəlilov
"AY MEDİA COMPANY"
