Paris şəhərindəki “Carrousel du Louvre” müasir incəsənət salonunda keçirilən 30-cu “Art Shopping Paris 2022” sərgisində dünyanın müxtəlif ölkələrində yaşayan Azərbaycan əsilli rəssamların əsərləri nümayiş etdirilib.
Azərbaycan guşəsi “Toile d’Or” (Qızıl kətan) mükafatçısı, tanınmış rəssam Nigar Nərimanbəyovanın “Asiya & Nigar Art Gallery” qalereyasının təşkilatçılığı ilə yaradılıb.
Qalereyanın stendində Nigar Nərimanbəyova, Lalə Hüseynova, Marina Okampo, Təranə Rəhimova, Marta Ramazan, Sevər Məmmədova, Leyla Qurbanova, Fərəh Hacızadə, Nərmin Paşazadə, Nuray Xudiyeva və Əfruz Rəhimovanın əsərləri təqdim olunub. Rəng çalarlığı və kompozisiya baxımından sənətsevərlərin diqqətini cəlb edən əsərlər maraqla qarşılanıb.
Qeyd edək ki, “Art Shopping 2022” müasir nəslin sərbəst fikirlərini əks etdirən sərgidir. Bu il sərgi iki yubiley hadisəsini – öz mövcudluğunun 15 illiyini və Paris nəşrinin 30 illiyini qeyd edir.
Xatırladaq ki, uzun illərdir Parisdə yaşayan Nigar xanım Nərimanbəyovlar nəslinin davamçılarından biri, görkəmli azərbaycanlı rəssam Vidadi Nərimanbəyovun qızıdır. Məşhur rəssam Toğrul Nərimanbəyov Nigar xanımın əmisidir.
AY MEDİA COMPANY
