1971-ci ildə Gədəbəydə anadan olan Natiq Qasımov Yaqub Rzayevin Qarabağ şahinləri dəstəsində xidmət edib. 1992-ci ilin martında Natiq və altı həmkarı alban kilsəsinin yerləşdiyi strateji əhəmiyyətli yüksəkliyi qorumaq üçün Pirlərdəki posta göndərilir. Natiqin altı yoldaşı şəhid olur. O, susuz, çörəksiz tək qalır, beş gün erməni qəsbkarlarına qarşı müqavimət göstərir, onları Azərbaycan bayrağını qaldırdığı dirəyə yaxın buraxmır. Ermənilər elə bilirlər ki, kilsədə bütöv bir batalyon var və şantaj yolu ilə yüksəkliyi ələ keçirməyə qərar verirlər. Xocalının əsir sakinlərindən biri yaşlı müəllim Cəfər Cəfərov dağılmış kilsəyə "Əgər təslim olmasanız, girovumuz olan 22 Xocalı sakinini güllələyərik" xəbərilə göndərilir.

Həmin vaxt Natiqdə iki patron qalmışdı. Düşmənə sağ-salamat təslim olmamaq üçün onları özü üçün saxladı. "Komandirə söz verdim ki, vəzifəmi tərk etməyəcəm. Bəs bayrağımızı burada qoyub necə gedə bilərdim? Qarabağ "şahini" Cəfərova deyib.
22 girovun həyatı naminə Natiq təslim olmaq məcburiyyətində qalıb. Bir əlində bayraq, bir əlində avtomat var idi. O, havaya atəş açıb. Pirlərdə ağır itkilərlə üzləşən ermənilər bütün bu günlərdə onlara qarşı yalnız bir nəfərin çıxmasına inana bilmirdilər.
Əsir və itkin düşmüş, girov götürülmüş vətəndaşlarla əlaqədar Dövlət Komissiyasından verilən məlumata görə Natiq Qasımovun adı ermənilər tərəfindən əsir götürülən şəxslərin siyahısında olub. Amma Dövlət Komissiyasının çoxsaylı müraciətlərinə baxmayaraq, Ermənistan tərəfi hələ də Natiq Qasımovun sonrakı taleyini Azərbaycandan və beynəlxalq təşkilatlardan gizlədir.

Aymediacompany.az