Lüksemburqda keçirilən 62-ci Beynəlxalq Lüksemburq Bazarında uğurla təqdim olunan Azərbaycan stendi ziyarətçilərin marağına və rəğbətinə səbəb olub.
Lüksemburqda yaşayan soydaşlarımız Seymur Əhmədov və Samir Məmmədovun təşkilatçılığı, Azərbaycanın Lüksemburq Böyük Hersoqluğundakı səfirliyinin, “Azersun”, “Meyseri”, “Silkway Cargo” şirkətlərinin dəstəyi ilə yaradılmış Azərbaycan stendi Qala divarları formasında qurulub və milli ornamentlərlə bəzədilib.
Azərbaycan stendində Heydər Əliyev Fondunun ölkəmizin tarixi, mədəniyyəti, musiqisi və mətbəxi ilə bağlı nəşrləri nümayiş olunub, “Azərsun”, “Azərİpək”, “Gilan Holding”, “Aspi”, “Viva”, “iLoveBaku” şirkətlərinin “Made in Azerbaijan” brendi məhsulları, təravətli çaylar, meyvə şirələri, nar şirəsi, quru meyvələr, milli şirniyyatlarımız təqdim olunub. Stenddə qurulmuş böyük ekranda mədəniyyətimizi təşviq edən videoçarxlar yayımlanıb. Bu nəşrlər və videoçarxlar stendimizi ziyarət edən lüksemburqlulara və turistlərə ölkəmiz haqqında ətraflı məlumat almağa imkan verir. Nəşrlər ziyarətçilərə hədiyyə edilib.
Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyevanın dəstəyi ilə UNESCO-nun Qeyri-Maddi Mədəni İrs üzrə Reprezentativ Siyahısına daxil edilmiş, Azərbaycan qadın geyiminin qədim atributu olan müxtəlif çeşidli ipək kəlağayılar da Beynəlxalq Bazarda çox sevilən hədiyyələr arasında olub.
Azərbaycan stendini ziyarət edən Lüksemburqun Baş naziri Ksavye Bettel yüksək səviyyəli qonaqpərvərliklə qarşılanıb. Mötəbər qonağa Azərbaycanın tarixi, mədəniyyəti, məhsulları haqqında ətraflı məlumat verilib və milli mətbəximizin ləziz təamları təqdim olunub.
Tədbir çərçivəsində Azərbaycanın əməkdar artisti,
pianoçu, bəstəkar İsfar Sarabski və tarzən Bəhruz Zeynal musiqi proqramı ilə çıxış ediblər. Stendimiz qarşısına toplaşan ziyarətçilər azərbaycanlı musiqiçiləri heyranlıqla dinləyiblər.
“Luxembourg Times” portalında yayımlanan məqalədə Azərbaycan stendinin zənginliyindən bəhs edilib, təşkilatçılarımızın tədbirlə bağlı fikirlərinə yer verilib. Lüksemburq Böyük Hersoqluğunda yaşayan 200-dən çox azərbaycanlının Lüksemburq dilində səlis danışdığı və yerli cəmiyyətə yüksək səviyyədə inteqrasiya etdiyi bildirilib.
