Türkiyənin Antalya şəhərində Şuşanın 270 illiyinə həsr olunmuş “Cənnətim Qarabağ” adlı silsilə tədbirlər keçirilib. 
İncəsənət və Gülverən Anadolu liseylərində, eləcə də Erdem Bayazıt Mədəniyyət Mərkəzində baş tutan tədbirlər Antalya Azərbaycan Kültür və Həmrəylik Dərnəyi,  Antalya Təhsil şöbəsi və Kəpəz Bələdiyəsinin birgə təşkilatçılığı ilə gerçəkləşdirilib. 
Azərbaycan və Türkiyənin Dövlət himnlərinin səsləndirilməsi ilə başlayan tədbirlərdə qonaqları Antalya Azərbaycan Kültür və Dayanışma Dərnəyinin sədri Ceyran Səttarova salamlayıb. Azərbaycan Milli Konservatoriyası tərkibində Respublika İncəsənət Gimnaziyasının müəllimi Hicran Sadıqzadə ölkəmizin mədəniyyət paytaxtı, Qarabağın tacı olan Şuşa şəhərinin tarixi barədə ətraflı məlumat verib. Antalya Təhsil İdarəsinin müdürü Emre Çalışkan və başqaları çıxışlrında Azərbaycan və Türkiyə qardaşlığından, Qarabağ Zəfərindən, “bir millət, iki dövlət” konsepsiyasının önəmindən danışıblar.
Bədii hissədə Respublika İncəsənət Gimnaziyasının müəllim və şagirdləri, eləcə də Əməkdar artist Firuzə İbadova konsert proqramı ilə çıxış ediblər. Tamaşaçılara  muğam, xalq mahnıları və milli rəqslər təqdim olunub, səhnəciklər göstərilib.
Tədbir çərçivəsində Qarabağa və Şuşaya həsr olunmuş sərgi nümayiş etdirilib.