5 mart ölkəmizdə Bədən Tərbiyəsi və İdman günüdür. Bu tarix Prezident İlham Əliyevin Bədən Tərbiyəsi və İdman Gününün təsis edilməsi haqqında 2005-ci il 4 mart tarixli Sərəncamına əsasən qeyd edilir. Ölkəmizdə idmanın inkişafı ildən-ilə daha geniş vüsət alır. Azərbaycan indi dünyada güclü idman ölkəsi kimi tanınır.
Azərbaycanda bədən tərbiyəsi və idman gününün martın 5-i qeyd olunması təsadüfi deyil. Məhz 1995-ci il martın 5-də Heydər Əliyev Bakı İdman Sarayında dünya və avropa çempionatlarının qalibləri ilə görüşüb. “İdmana qayğını öz üzərimə götürürəm və siz bu qayğını daim hiss edəcəksiniz” - ulu öndərin bu tarixi sözləri söylədiyi həmin tədbirdə bədən tərbiyəsi və idmanın inkişafında yeni strateji istiqamət müəyyənləşdirdi. Həmin tarixi görüşdən az sonra Azərbaycan Prezidenti Yanında İdman Fondu yaradıldı. Görüşün iştirakçılarından olan idman mütəxəssisləri 5 martın Azərbaycanın idman həyatında dönüş nöqtəsi olduğunu bildirir.
Elə həmin dövrdə İlham Əliyev milli olimpiya komitəsinin prezidenti seçiləndən sonra ölkəmizdə idmana diqqət daha da artdı. Maddi-texniki baza möhkəmləndirildi, idmançıların məşq şəraiti yaxşılaşdırıldı, onların yarışlara peşəkar səviyyədə hazırlaşması üçün lazımi tədbirlər görüldü. Bütün bunlar tezliklə mötəbər turnirlərdə nailiyyətlərində əksini tapdı. Sidney, Afina, Pekin, daha sonra London və Rio-de-Janeyro olimpiadalarında Azərbaycan idmançıları uğurla çıxış etdilər. 1996-cı ildən bəri ötən müddət ərzində atletlərimiz dünya komandaları arasında liderlər qrupuna doğru irəliləyərək ilk 20-liyə daxil olub, olimpiya hərəkatının ən fəal üzvləri kimi tanınıblar.
Respublikamız təkcə atletlərimizin uğurları ilə deyil, həm də beynəlxalq idman tədbirlərinin nümunəvi təşkilatçısı kimi də şöhrət qazanıb. Mütəxəssislər də etiraf edirlər ki, artıq Azərbaycan dünyanın idman mərkəzlərindən birinə çevrilib. Ölkə rəhbərinin idmanı sevməsi, idmançılara xüsusi həssaslıqla yanaşması, yeni idman bazalarının yaradılması haqqında qərarları buna əyani sübutdur. İndi təkcə Bakıda deyil, bütün bölgələrimizdə müasir olimpiya kompleksləri fəaliyyət göstərir. Onların nəzdində yaradılan bölmələrin yetirmələri ən müxtəlif turnirlərdə fərqlənirlər.
Daim Azərbaycan bayrağını qürurla dalğalandırmaq üçün bütün yarışlarda yüksək əzmkarlıqla mübarizə aparan idmançılarımız Vətən müharibəsində də eyni amal – üçrəngli bayrağımızın əzəli torpaqlarımızda ucaldılması üçün cəbhəyə yolandılar. Vətən müharibəsində idman sahəsi üzrə 500 nəfər İkinci Qarabağ müharibəsində iştirak etdi. Onlardan 54 nəfəri şəhidlik zirvəsinə yüksəlib. Azərbaycanın ərazi bütövlüyü uğrunda gedən döyüşlərə 390 nəfər könüllü kimi qatılıb. Hərbi xidmətə çağırılanlar 33, hərbçi kimi iştirak edənlər isə 23 nəfər olub. Müharibə iştirakçılarından 67 nəfər yaralanıb. Bütün bunlar Azərbaycan idmançılarının doğma Vətəni canları qədər sevdiklərini, onların nümunəvi vətəndaş olduqlarını bir daha sübut edir.
"Dəmir Yumruq Alfa -A" cəmiyyəti "Gənc Qazilər" İctimai birliyi və "Xüsusi Təyinatlı İdman Məktəbi"nin təşkilatçılığı ilə birlikdə təşkil etdiyi tədbirdə idmançıları bayram münasibəti ilə təbrik etdilər. Tədbirdə idmançılara fəxri diplomlar təqdim olundu. "Dəmir Yumruq Alfa -A" cəmiyyətinin sədri Ülviyyə Əsədova idmançılara təbrikində dedi: -"Biz maddi və mənəvi dəstəyimizi sizdən əsirgəməyəcəyik, yetər ki, çempion olun, Vətənimin bayrağını daim hər bir ölkədə uca zirvələrdə dalğalandırın. "Gənc Qazilər" İB-nin sədri Hacı Vəliyev də, sizlər də bizim fəxrimizsiniz."
"Xüsusi Təyinatlı İdman Məktəbi"nin direktoru Muxtar müəllim idmançı tələbələri ilə qürur duyduğunu qeyd etdi.
Tədbridə 5 qat Avropa və Dünya çempionu Elnur Cəfərov, "Xüsusi Təyinatlı İdman Məktəbi"nin vitse prezidentləri - Məmmədov Ələkbər, Abbasov Oruc, İsrafilov Rəşad, dünya çempionu Əliyev Canpolad, fəxri qonaqlar, Şəhid valideynləri, KİV nümayəndələri iştirak edirdilər. Tədbirdə çıxış edənlər idmançılarımıza uğurlar, yarışlarda qələbə qazanmağı arzuladılar.
İdmanın Qarabağa qayıdışı yolunda ilkin addımların atılacağına əminik. Bu istiqamətdə ilk addım isə Ağdam şəhərində “İmarət” stadionunun yenidən inşası olacaq. Bu il daha məsuliyyətli və idman yarışları ilə zəngin ildir. İnanırıq ki, bu il idmanın bütün istiqamətlərində uğur qazanacağıq. Biz birlikdə daha güclü olduğumuzu yarış meydanlarında da sübut edəcəyik.
Almaz Yaşar
"AY MEDİA COMPANY", direktor
"Dəmir Yumruq Alfa-A".az, icraçı direktor
