ŞƏHİD - Vətən, torpaq, millət yolunda öz istəyi ilə canından keçməyə razı olan insanların fəth etdiyi ən yüksək, şərəfli zirvədir. ŞƏHİDLƏR xalqın azadlığını canı ilə qazanıb, qanı ilə yazanlardır. Onların canı, qanı bahasına qazandıqları azadlıq və müstəqillik xalq tərəfindən heç vaxt unudulmur.
Qəhrəman oğullarımız vətən sevgisi ilə  illərdir işğal altında əzab çəkən torpaqlarımızı vətən etdilər. Yurda azadlıq,qəlblərə rahatlıq gətirdilər. Belə qəhrəmanlarımızdan biri də Şəhid Emil İsgəndərovdur. Onun həyat  hekayəsi qısa olsa da, çox şərəflidir. Bir ailənin oğlu kimi doğulub vətənə dirək oldu. Özü yaşamadı, Vətəni yaşadanlardan oldu…Ömürünü Vətənə qurban verənlərdən oldu.
Bu gün Vətən Müharibəsi Şəhidi Gizir Emil Vaqif oğlu İsgəndərovun cənnətdəki 3-cü mövlud günüdür.

Emil İsgəndərovun bu gün 33 yaşı tamam olur.

Emil İsgəndərov 1990-cı ilin avqust ayının 5-də dünyaya gəlib. Ailədə 3 qardaşdan biri, evin böyük övladı olub. Orta məktəbi bitirdikdən sonra, 2008-2010-ci illərdə həqiqi hərbi xidmətdə olub, Vətənin keşiyində dayanıb. Əsgərliyini başa vurduqdan sonra yenidən həyatını hərb ilə bağlayıb. Daxili İşlər Nazirliyinin (DİN) Daxili Qoşunlarında fəaliyyətə başlayıb. Daxili Qoşunların Xüsusi Təyinatlı Dəstəsinin Giziri olub.
İkinci Vətən Müharibəsi zamanı isə Füzuli, Cəbrayıl, Qubadlı və Şuşa istiqamətlərində döyüşüb.
Emildən başqa digər qardaşları-İsgəndər İsgəndərov və Əli İsgəndərov da müharibədə iştirak ediblər. Atası Vaqif İsgəndərov isə Birinci Qarabağ savaşının iştirakçısı olub.
Emilin şərəfli döyüş yolu 38 gün çəkib və noyabrın 4-də Şuşa istiqamətində gedən döyüşlərdə qəhrəmancasına Şəhidlik məqamına ucalıb.
Cənnətdəki üçüncü doğum günü ilə bağlı bu gün Şəhidin Sumqayıt şəhər Şəhidlər Xiyabanında məzarı ziyarət olunub. Məzarı üzərinə gül dəstələri düzülüb, ruhuna dualar oxunub. Qısa çıxışlar edilib, Şəhidin İgidliyi və Qəhrəmanlığından bəhs olunub. Şəhidimizin cənnətdəki üçüncü doğum günü təbrik olunub.
Məzarını ziyarətdə və Cənnətdəki üçüncü doğum günü ilə bağlı mərasimdə Şəhidin ailə üzvləri, Şəhid ailələri, din xadimləri, Sumqayıt şəhər İcra Hakimiyyətinin "Şəhid ailələri və Vətən müharibəsi Qaziləri ilə iş" üzrə şöbə müdürü Tərlan Hacızadə, "AY MEDİA COMPANY.az" media qrupunun rəhbəri Almaz xanım Yaşar, "Dəmir Yumruq Alfa-A" cəmiyyətinin sədri Ülviyyə xanım Əsədova, "Qanunyoluinfo.az" saytının rəhbəri Arif Süleymanlı, "AtaTv.az", "İXA"nin rəhbəri Rəsafil Bayramov, "Sabaha inamla.az" saytının rəhbəri Namiq Məmmədov, hərbçilər, Qazilər, Şəhidimizin dostları, 10 saylı orta məktəbin müəllim və şagird kollektivi, şəhər sakinləri və digər rəsmi şəxslər iştirak ediblər.
Sonra Şəhidin ailəsinin yaşadığı evdə mərasim düzənlənib, adına ehsan verilib.

Emil İsgəndərov ailəli idi, iki oğul övladı - İbrahim və Nicat bizlərə əmanət qaldı...
Emil İsgəndərov Sumqayıt şəhəri Şəhidlər Xiyabanında dəfn olunub.

Ruhun şad, mövludun mübarək, İgid! Bu torpaqlar uğrunda canından keçən hər bir igid Azərbaycan oğullarını hörmətlə anırıq.