Atalarımız deyir ki: "Acın imanı olmaz, toxun amanı, qanmazın dərmanı."
Məmləkətdəki imansız acları amansız toxlar idarə etdikcə, qanmazların dərmanı tapılmayacaq. Ona görə ki, evində bir tikə çörəyi yoxdur, acdır, ona toxlar tərəfindən göstərilən sosyal platformalarda əxlaqi keyfiyyətlərdən tamam uzaq olan adamlara əslində imansızlıqları ucbatından hədiyyə atır, qanmazlara öz qanmazlıqlarında haqlı olduqlarını təlqin edirlər. Ona görə də ac və qanmazlar amansızların qarnını doydurur, özləri ac qalırlar. İnsanlarımızın bir çox hissəsinin bəlkə də təhsilsizliyi və bundan yaranan dünya görüşünün zəifliyi belə bir mühitə həvəsləndirir, bunu demək olmur. Riyaziyyat alimi əl-Xarəzmidən insanın qiyməti haqqında soruşduqda o belə bir cavab verir: "-Əgər insanın əxlaqı varsa, bu bir rəqəm deməkdir; Əgər insan həm də gözəldirsə, bu 1-in yanına sıfır da artır=10 -Əgər insanın həm də pulu varsa, bura daha bir sıfır artır=100 -Əgər insan həm də əsil-nəcabətlidirsə daha bir sıfır artır=1000 Alınan rəqəmdən 1 (yəni,əxlaq) getsə insanın qiyməti yerdə qalan sıfırlara bərabər olacaq.
Cəmiyyətimizin qəribə bir tipə bölünən hissəsi var ki, elə bil anlaqlı ya anlaqsız əxlaqdan, mənəviyyatdan uzaq olan sosyal platforma “fenomenlərinə” dəstək olurlar. Bu böyük bir faciədir. Bu qədər Şəhidi, Qazisi, xəstəsi, sosyal problemi olan, fərqli çətinliklərdə əziyyət çəkən insanları olan bir məmləkətin bəzi insanlarına heç yaraşmır belə aşağı
səviyyəli insanlara dəstək olsunlar. Axı sosyal aləmdən evlərimizə girən bu adamlar övladlarımızın, uşaqlarımızın gələcəyinə zərər vurur, pis örnək olurlar. Onlayn aləmdə “fenomen”lərin demək olar ki, çox hissəsi təhsilsiz və cəmiyyətə heç bir yararı toxunmayan, əksinə, öz hərəkətləri ilə gəncliyimizin şüuraltına mənfi görüntülər ötürərək ziyan vuran adamlardır. Bəs sosyal problemi olan gənclər nə düşünür?! Düşünürlər ki, “bu qədər təhsil alıb, oxuyub, işləyə bilməyəcəmsə və yaxud işləyib az bir müavinətlə dolana bilməməkdənsə mən də “fenomen” olum, asan yolla pul "qazanım”. Çünki sosyal aləmin bu tip insanlarının yüngül davranışlar və “şou” göstərərək necə yüksək məbləğdə pul qazandıqlarını görən gəncliyimiz də bu adamlar kimi olmaq istəyirlər. Bu böyük problemdir, ancaq nədənsə sosiyoloqlar, media işçilərinin nədənsə çoxu bu məsələyə qarşı nəinki soyuq yanaşır, diqqət belə göstərmirlər. Ümidvarıq ki, ictimai xadimlər, aidiyyatı şəxslər, gələcəyimizə, mənəviyyatımıza təhlükə olan bu biyabırçılıqları öz gündəliklərinə əlavə edərək, bu problemlərin həll olunmasında öz səylərini göstərəcəklər.

Fərid Əmiraslanov
"AYMEDİACOMPANY.AZ" mədəniyyət şöbəsinin müdiri