Qarabağın dilbər güşəsi Bərdənin İmamzadə kompleksinin ərazisində müqəddəs İmamzadə məscidinin ətrafında tarixi əhəmiyyət kəsb edən abidələr var. Bunlardan biri də məscidin şərqində yerləşən XIV əsrdə tikilmiş Axsadanbaba türbəsidir. Bir çox ölkə əhəmiyyətli tarixi abidələrimiz var ki, onların yalnız qalıqları günümüzə qədər gəlib çıxıb. Türbənin yalnız yeraltı hissəsi qalıb. Abidəni araşdırdığımız zaman ətrafda yaşayan sakinlər bildirdilər ki, ta qədimdən deyilənə görə həmişə içimizdə yaşayıb, süfrəmizin çörəyindən yeyən mənfur ermənilər bu abidənin daşlarını söküblər. Sərdabənin altıpərli yastı gümbəzi var. Pərlər kəsmə daşdan quraşdırılıb, zəngin ornamentlərlə bəzədilib. Qalıqlardan belə görsənir ki, abidəyə bir neçə yerdən giriş var. Taxçalardakı kaşı üzlüyündə çoxguşəli və ulduz şəkilli naxışlar var. Kitabələri dağıdılıb. Türbənin dağıdılması mənfur düşmənlərimizin əməlləridir. XX əsrin əvvəllərində bolşevik-daşnak istilası dövründə Bərdə rayon İcraiyyə Komitəsinin sədri Xaçimov (ermənidir) və yenə də milliyyətcə erməni memarın göstərişi ilə Axsadanbaba türbəsi sökülüb dağıdılmışdır. Məlumata görə Axsadanbaba türbəsinin şəkli XX əsrin əvvəllərində rus rəssamı tərəfindən çəkilmiş və hazırda Azərbaycan tarixi muzeyində saxlanılır. Abidə dövlət tərəfindən qorunur.

Fərid Əmiraslanov
"AYMEDİACOMPANY.AZ" mədəniyyət şöbəsinin müdiri