Yanvarın 17-də Yeni Azərbaycan Partiyasının Nərimanov rayon şöbəsinin inzibati binasında 7 fevral növbədən kənar Prezident seçkiləri ilə bağlı millət vəkili Hikmət Məmmədovun Şəhid Milli Qəhrəman və Şəhid Vətən Müharibəsi Qəhrəmanı ailələri ilə görüşü keçirildi. Görüşdə YAP Nərimanov rayonu təşkilatının rəhbəri Samir Vəliyev, "Milli Qəhrəmanların Tanıtma" İctimai Birliyinin Nərimanov rayonu sədri Ədhəm Məmmədov, sabiq millət vəkili Eldar Abbasov, hər iki Vətən Müharibəsinin qaziləri, Şəhid valideynləri iştirak etdilər. Tədbir iştirakçıları Şəhidlərimizi 1 dəqiqəlik sükutla yad etdi. Daha sonra söz YAP Nərimanov təşkilatının rəhbəri Samir Vəliyevə verildi. O çıxışında ölkəmizin ərazi bütövlüyünün bərpasından sonra yeni ictimai-siyasi durumun yaranmasını xüsusi qeyd etdi. Bununla əlaqədar 7 fevral növbədən kənar Prezident seçkilərində hamını İlham Əliyevə səs verməyə dəvət etdi. Çünki İlham Əliyev Ordumuzun Ali Baş Komandanı olaraq bizə Qarabağda Qələbə sevincini yaşatdı. Millət vəkili Hikmət Məmmədov Samir Vəliyevin dediklərini təsdiq edərək prezidentliyə növbəti 7 illik müddətdə başqa layiqli namizədin olmadığını söylədi. Tədbirdə iştirak edən diğər çıxışçılar da yekdil olaraq 7 fevral Prezident seçkilərində İlham Əliyevin namizədliyini dəstəklədilər.

Rüstəm Rüstəmov
"AYMEDİACOMPANY.AZ"