Bu günkü müsahibim Azərbaycan Milli Konservatoriyasının müəllimi, Opera və Balet teatrının solisti, Sumqayıt şəhəri Muğam Mərkəzinin direktoru, Beynəlxalq müsabiqələr laureatı xanəndə Aytən Məhərrəmovadır.
Aytən Məhərrəmova 14 iyun 1987-ci ildə Bakı şəhərində anadan olub. Ailədə incəsənətlə məşğul olan olmasa da, Aytənin hələ kiçik yaşlarından musiqiyə və incəsənətə böyük marağı olub. Respublikamızın xalq artisti Mənsum İbrahimov və mərhum sənətkarımız Əlibaba Məmmədova olan pərəstişkarlıq Aytənin təhsilini ilk öncə Bülbül adına orta ixtisas musiqi məktəbinə gətirir. Burada Aytən muğamlarımızın mahir bilicisi, pedaqoq, Xalq artisti Əlibaba Məmmədovun sinfində muğam biliklərinə sahiblənməyə başlayır.
2 il buradaki təhsilindən sonra Asəf Zeynallı adına Musiqi kollecində professor, xalq artisti Mənsum İbrahimovun sinfində davam elətdirir. Kollec təhsilinin ardınca Azərbaycan Milli Konservatoriyasını Bakalavr və Magistr pilləsi üzrə Mənsum İbrahimovun sinfində bitirir və hal-hazırda Doktorantura pilləsində təhsilini davam etdirir.
Aytən Məhərrəmova 2005-ci ildə Heydər Əliyev Fondunun təşəbbüsü ilə keçirilən dahi bəstəkar Üzeyir Hacıbəylinin 120 illik yubileyinə həsr olunmuş, 1-ci Televiziya Muğam müsabiqəsinin laureatı, 2011-ci ildə keçirilən 2-ci Respublika Muğam müsabiqəsinin və 2015-ci ildə IV Beynəlxalq Muğam müsabiqəsində 1-ci yerin qalibi olmuşdur. 2007-ci ildən pedoqoji fəaliyyətə başlayıb. Hal-hazırda Respublika İncəsənət Gimnaziyasında və Sumqayıt Musiqi Kollecində Muğam ifaçılığı ixtisası üzrə pedaqoji fəaliyyətini davam etdirir. Muğamımızı bir çox ölkələrdə keçirilən festivallarda təmsil edir. Amerika, Almaniya və bir çox avropa ölkələri olmaqla Gürcüstan, Türkiyə, Qazaxıstan, Özbəkistan, Polşa, Tacikistan, İran İslam respublikası, Rusiya Federasiyasının bir çox şəhərlərində Azərbaycan mədəniyyəti günlərində mədəniyyətimizi, muğamımızı təmsil etmişdir. Bütün bu fəaliyyətlərlə yanaşı sənətçi xanım Akademik Opera və Balet Teatrının solistidir və burada
Z.Hacibəylinin “Aşıq Qərib” operasında “Şahsənəm," M.Maqomayevin ”Şah İsmayıl” Operasında “Ərəbzəngi”, Ü.Hacibəylinin “Leyli və Məcnun” operasında “Leylinin anasi” və s. obrazlarını ustalıqla həyata keçirir. Sənətçinin bir çox yetişdirdiyi tələbələr müsabiqələr laureatı olmuşdur. Nümunə olaraq, 8-ci televiziya muğam müsabiqəsini göstərmək olar. Müsabiqədə Aytən Məhərrəmovanın tələbəsi Həzrət Əzizli 1-ci yerə layiq görülüb, Aliyə Ədilə isə diplomant olub.
Bütün bu xidmətlərinə görə Azərbaycan respublikası prezidentinin müvafiq sərəncamı ilə “Tərəqqi” medalına layiq görülüb.
Mədəniyyəti yaşatmaq xalqın özünü, milli kimliyini, keçmişini, bu gününü yaşadıb, gələcəyini qurmaqdır.Tarixi bilənlər yaxşı bilir ki, mədəniyyət bir xalqın mənəvi tarixi və yaddaşıdır. Bu yoldan gedənlərin xidməti də başqa bir cəbhədə millətin mənəvi əsgəri kimi xidmət etməkdir. Sənətçiyə bu çətin və şərəfli sənətində uğur və müvəffəqiyyət arzu edir, uğurlarını daha da artıraraq daha böyük arenada mədəniyyətimizi təbliğ etməyi arzu edirik.
Fərid Əmiraslanov
AYMEDİACOMPANY.AZ
