Bu günkü müsahibim gənc, istedadlı müğənni Surayə Sultandır.

-Surayə xanım, xoş gördük sizləri. İstərdim ki, müsahibəni oxucularımıza özünüz haqqında məlumat verməklə başlayasınız.

-Əvvəla sizə və Aymediacompany.az saytına gənc bir ifaçı kimi biz gənclərin yaradıcılığını işıqlandırdığınız üçün minnətdarlığımı bildirirəm. Mən, Surayə Sultan 1998-ci ildə İsrailin Petaxtikva şəhərində anadan olmuşam. İsraildə doğulmuş azərbaycanlı yəhudilərindənəm.

-Sosyal platformalarda qarşımıza bir neçə dildə ifanız çıxıb. İfaçılıq qabiliyyəti və yaradıcılıq sizdə necə üzə çıxdı?!

-Mən, İsraildə Bıney Brak şəhərində, David Remez adına orta məktəbdə təhsil alırdım. İlk ifaçılığa həvəsim də məktəbimizin nəzdində fəaliyyət göstərən xor ansamblında yarandı. Belə ki, xorun tərkibində İsrail xalq mahnılarını, əsərləri və dünya bəstəkarlarının musiqilərini ifa etmişəm. Bir çox dildə sərbəst danışa da bilirəm, İbrani və ingilis dillərini orta məktəbdə, Rus və Azərbaycan dillərini isə evdə valideyinlərimin sayəsində öyrəndim. Bu dillərdə sərbəst ana dili səviyyəsində oxuyub, danışıram.

- Musiqi təhsili almısınızmı?

-Bəli, İsraildə üç il, Azərbaycanda isə mərhum sənətkarımız Səxavət Məmmədovun tələbəsi Yaqub Məmmədovdan muğam təhsili almışam.

-Əsasən hansı janrlarda özünüzü təkminləşdirmisiniz?

-Jazz, Blues, Soul, R&B, Estrada və Şərq musiqi janrlarında ifa edirəm.

-Azərbaycana olan sevginiz və gəlib burda fəaliyyət göstərməyə sizi nə vadar etdi?!

-Uşaqlıqdan Azərbaycanı ziyarət etmişik. Əslən ata və anamın Azərbaycanlı olması, İsraildə yaşasaq da məni milli mənəvi dəyərlərə söykənərək böyütmələri və yetişdirmələri, həmişə milliliyimizi aşılamaqları məndə vətənpərlik hissi yaradıb. Həmişə orada yaşasam da Azərbaycan üçün darıxmışam və daxilimdə hər zaman bir istəyim olub ki, Azərbaycanda yaşayım, burada da sənətimlə məşğul olum. İsrail-Azərbaycan dostluq və qardaşlığı məni bu işə daha da həvəsləndirdi.

-Azərbaycana gəlməyiniz necə baş tutdu və burada özünüzü necə hiss edirsiniz?

-İsraildə, bildiyiniz kimi, xanımlar da hərbi xidmət keçir. Mən də hər bir İsrail vətəndaşı kimi hərbi xidmətimi başa vurub 2021-ci ildə Azərbaycana gəldim. Burada Gəncə şəhərində bizim evimiz vardı. Uşaqlığımda çox gəlib getmişik. Mən Azərbaycanda özümü, doğulduğum İsraildə necəyəmsə elə də hiss edirəm. Bura mənim üçün ikinci vətən yox, elə vətənin özüdür.

-Azərbaycandaki fəaliyyətinizə necə başladınız?!

-Burada adını çəkmədiyim bir çox incəsənət adamları ilə daimi ünsiyyətdə və əlaqədə olduğum üçün musiqi cəmiyyətinə qoşulmağım və fəaliyyətim mənim üçün elə də çətin olmadı.

-Bəs el şənliklərində iştirakınız necə oldu?

-Məlumdur ki, Azərbaycanda bu işlə məşğul olan bir çox toy menecerləri var. Onların mənə böyük dəstəyi oldu və mən toylarda da iştirak etməyə başladım.

-İncəsənət nümayəndələri ilə qalmaqallarınız olurmu?

-(Gülür) Xeyir, əksinə mən bir çox ifaçıya ingilis, fransız, italyan, yunan, o cümlədən ibrani dillərində ifa etməyə köməklik etmişəm. Bilirsiniz ki, hər hansı bir dildə danışmaq və mahnı ifa etmək tamamilə fərqli şeylərdir. Bunun üçün gərək ifaçının özündən bəhrələnəsən. Mən də bildiyimi həmişə öyrətməyi sevən insanam. Buna görə də qalmaqalla deyil, həmişə sənətimlə özümdən söz etdirmək meyarım olub.

-Azərbaycanda incəsənətdən başqa daha hansı sahədə fəaliyyət göstərirsiniz?

- Mən Azərbaycanda fəaliyyət göstərən dil kurslarının birində İbrani və İngilis dilində dərs tədris edirəm.

-Bəs burada təhsil almaq fikriniz varmı?

-Bəli, artıq mən bu ildən Azərbaycan Milli Konservatoriyasının jazz fakultəsində təhsil almağa başlayacam.


-Sizə təhsilinizdə uğurlar arzu edirik. Bəs təhsilinizlə bərabər televiziyada ifa etməklə bağlı gələcək planlarınız varmı, ümumiyyətlə, Azərbaycan efir teleməkanında çıxışınız olubmu?

-Bəli, Arb kanalında Kazım Sübhanın təqdimatında “Özəl Akkustik” verilişinin musiqili qonağı olmuşam. Hələki yeni layihələr üzərində çalışdığım üçün efir teleməkanına çıxmağa tələsmirəm. Ümidvaram ki, musiqi lahiyələrimizi tamamlayandan sonra efirlərdə tez-tez məni görə biləcəksiniz.

-Sizə uğurlar arzu edirəm. Ümid edirəm ki, siz bizim qarşımıza daima uğurlu çıxışlarla, yüksələn sənət və yaradıcılığınızla çıxacaqsınız. Sonda oxucularımıza nə demək istəyərdiniz?!

-Sizlərə təşəkkür edirəm. Mən bir azərbaycan yəhudisi kimi həmişə istəmişəm ki, bütün azərbaycanlılar dünyada azərbaycançılığı olduqları yerdə təbliğ etsinlər. Mən İsraildə Azərbaycanı həqiqətən də tanıtmaq üçün öz milli kimliyimizi həmişə nümayiş etdirmişəm. Özüm kimi xarici ölkələrdə yaşayan və çalışan insanlara bir gənc kimi onu demək istəyirəm ki, azərbaycançılığımızı unutmasınlar, adət-ənənələrimizi qoruyub saxlasınlar, tanıtdırsınlar, milli kimliyimizi təbliğ eləsinlər. İnanıram ki, növbəti müsahibələrimizdə sənət şəcərəm və fəaliyyətimlə sizə daha fərqli və zəngin məlumatlar təqdim edəcəm. Sağ olun.

-Sağ olun.