Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidmətinin (ETX)
nümayəndə heyəti 5-7 avqust 2024-cü il tarixində Qazaxıstana işgüzar səfər edib.
Səfər çərçivəsində ETX və Qazaxıstanın özəl Kompüter İnsidentlərinə qarşı Mübarizə
Mərkəzi (CERT) olan TSARKA arasında informasiya təhlükəsizliyi və kibertəhlükəsizlik
sahələrini əhatə edən Anlaşma Memorandumu imzalanıb. Memorandum tərəflər
arasında informasiya təhlükəsizliyi, məlumat və təcrübə mübadiləsi istiqamətində birgə
fəaliyyəti nəzərdə tutur.
Görüş zamanı, həmçinin tərəflər arasında əməkdaşlığın perspektivlərinə və TSARKA
təşkilatının informasiya təhlükəsizliyi və kibertəhlükəsizlik sahəsində təqdim etdiyi
məhsul və xidmətlərə dair fikir mübadiləsi aparılıb.
Qeyd edək ki, ETX Azərbaycan Respublikası Prezidentinin 2023-cü il 28 avqust tarixli
Sərəncamı ilə təsdiq edilmiş “Azərbaycan Respublikasının informasiya təhlükəsizliyi və
kibertəhlükəsizliyə dair 2023-2027-ci illər üçün Strategiya”sının icrasına uyğun olaraq
digər ölkələrin CERT-ləri və oxşar qurumları ilə əməkdaşlığın qurulması istiqamətində
fəaliyyətini davam etdirir.