14-18 oktyabrda İtaliyanın Milan şəhərində keçiriləcək 75-ci Beynəlxalq Astronavtika
Konqresində Azərbaycanı 52 tələbə, gənc mütəxəssis və alimdən ibarət milli elmi
komanda təmsil edəcək.
Ötən il Bakıda keçirilən Beynəlxalq Astronavtika Konqresindən sonra Azərbaycandan ilk
dəfə kosmosun elm profili üzrə beynəlxalq platformada bu qədər yüksək sayla iştirak
qeydə alınıb. Bununla bağlı 7 oktyabrda Azərkosmosun nəzdində fəaliyyət göstərən
KOSMİK Akademiyanın və Elm və Təhsil Nazirliyi yanında Elm və Ali Təhsil üzrə Dövlət
Agentliyinin SABAH qruplarının təşkilatçılığı, eləcə də İnnovasiya və Rəqəmsal İnkişaf
Agentliyinin dəstəyi ilə gənclərlə Konqres öncəsi tədbir keçirilib.
Xatırladaq ki, Azərbaycandan Milan Konqresinə 345 elmi məqalə təqdim olunub.
Azərbaycanın bu il yüksək göstəriciyə nail olmasında ötən il Bakıda keçirilən Konqresin
xüsusi rolu olub. Milan Konqresinə Azərbaycandan təqdim olunan elmi məqalələrin
90%-i gənclər tərəfindən hazırlanıb. Gənclərin kosmik sahədə öz elmi məqalələrini
beynəlxalq auditoriyaya təqdim etməsi ölkəmizdə kosmik ekosistemin inkişafı yolunda
aparılan fəaliyyətlərin nəticəsidir.
Qeyd edək ki, “Dayanıqlılıq naminə kosmik məsuliyyət” (Responsible Space for
Sustainability) çağırışı ilə keçirilən 75-ci Beynəlxalq Astronavtika Konqresində
Azərbaycanı təmsil edəcək milli elmi komanda Bakı Dövlət Universiteti, Azərbaycan
Dövlət Memarlıq və İnşaat Universiteti, Azərbaycan Dövlət İqtisad Universiteti, Milli
Aviasiya Akademiyası, ADA Universiteti, Azərbaycan Texniki Universiteti, Azərbaycan
Dövlət Neft və Sənaye Universiteti, Azərbaycan Dövlət Pedaqoji Universiteti,
Azərbaycan İdman Akademiyası və Sumqayıt Dövlət Universitetinin tələbə, gənc
mütəxəssis və alimlərindən formalaşıb.
Bakı Konqresinin yaratdığı yüksəksəviyyəli tədbir standartı sayəsində dünyada builki
Astronavtika Konqresinə maraq artıb və nəticədə Milan Konqresinə 106 ölkədən
ümumilikdə 7000-dən çox elmi məqalə təqdim edilib.