Xəbər verdiyimiz kimi, gecə saatlarında yağan yağışın normadan dəfələrlə artıq olması nəticəsində paytaxtın Nərimanov rayonu Heydər Əliyev prospekti, “Bağırov korpüsü”nün ərazisində subasma qeydə alınıb. Nəticədə həmin ərazidə hərəkət iflic olub.

Bakı şəhər İcra Hakimiyyətinin başçısı Eldar Əzizov və aidiyyəti struktur rəhbərləri təcili əraziyə gələrək, baxış keçirib, təxirəsalınmaz tədbirlərin görülməsinə başlanılıb. Ümumiyyətlə, yağış yağanda sel-su yolları, tunelləri basır. “Bağırov körpüsü” ilə yanaşı bir neçə ərazidə də oxşar hal yaşanır. Görəsən, o tunel tikiləndə hesablama aparılmırmı, selötürücü qurğularla təmin edilmirmi?

Globalinfo.az Azərbaycan Avtomobil Yolları Dövlət Agentliyinə (AAYDA) sorğu ünvanlayıb.

Cavab olaraq bildirilib ki, yol infrastrukturu yaradılarkən xüsusən tunel və tunel tipli yol qovşaqlarının inşası zamanı suyun axıdılması önəmli məsələlərdən biridir:

“Bununla əlaqədar tunellərdə yığılan suyun axıdılması üçün sistem və nasoslar quraşdırılır. Bu sistem isə mövcud yağışla kanalizasiya kollektorlarına qoşulur. Güclü yağışlar zamanı bəzən sözügedən kollektorlar yüklənir deyə, tunellərdən ora daxil olan suyu ötürə bilmir. Nəticədə həmin su geri daşmağa başlayır ki, bu da nəticədə tunellərin su ilə dolmasına gətirib çıxarır”.

Zaira Akifqızı
Globalinfo.az