Bu gün Sumqayıt şəhər Tarix Muzeyində "Azərbaycan Vətənpərvərlər" İB-nin Sumqayıt şəhər filialının təşkilatçılığı ilə Laçın rayonunun işğaldan azad olunması münasibətilə "Dəmir Yumruğun Zəfəri" adlı tədbir keçirilib.

30 il düşmən tapdağı altında qalan, üzərini qatı-qara duman alan, elinin ərazidən çıxması ilə gündüzü gecəyə dönən Laçın rayonu nəhayət ki, 30 illik həsrətdən sonra doğma insanlarına qovuşub. 2020-ci il tarixi yaddaşlara silinməz izlər qoyub. Məhz 2020-ci ilin 1 dekabr tarixində Laçın rayonunu Vətən müharibəsində əldə etdiyimiz qələbə nəticəsində imzalanmış üçtərəfli bəyanata əsasən, Azərbaycana təhvil verilib.

Tədbirdə "Azərbaycan Vətənpərvərlər "İB-nin kollektivi, ictimaiyyət nümayəndələri, Şəhid ailələri, Qazilər, Vətən müharibəsi iştirakçıları, KİV nümayəndələri,məktəblilər iştirak edirdilər.
Tədbir Şəhidlərimizin xatirəsi bir dəqiqəlik sükutla yad edilərək başladı, dövlət himni səsləndi. Çıxış edən natiqlər Vətən müharibəsi zamanı ərənlərimizin qəhrəmanlığından, Laçın rayonunun necə azad olunmasından danışdılar. İftixar hissi ilə bildiririk ki, otuz illik erməni işğalından azad olunan Laçın rayonunda yenidən üçrəngli şanlı Azərbaycan Bayrağı dalğalanır. Azərbaycanın ən böyük rayonlarından biri olan Laçının şəhid verilmədən erməni işğalından azad edilməsi ölkəmizin ictimai-siyasi həyatında möhtəşəm və parlaq tarixi hadisədir.
Məktəblilərin hazırladığı mahnı, şeir kompozisiyaları tədbir iştirakçıları tərəfindən alqışlarla qarşılandı.
Sonda xatirə şəkilləri çəkildi.

"AYMEDİACOMPANY.AZ"