Sanki vətən uğrunda şəhid olmaq üçün yetişdirilmişdir Əhmədov Yusif...
Ən böyük arzusu idi hərbiçi olub vətən torpağının üstündəki qara dumanı qovmaq.
Vətən nisgilli igidimiz elə bu məqsədlə yolunu hərbi sahəyə yönəldir.

Kiçik çavuş 8 il vətənin keşiyində dayanır.
"Vətən müharibəsində haqqımız olanı almağın vaxtıdır"- deyib döyüşə atılır... Düşmənlə göz-gözə döyüşərək arzusunu gerçəkləşdirir.

44 Günlük Vətən müharibəsində uğurlu döyüş yolu keçmiş,Cəbrayıl, Xocavənd, Qubadlı istiqamətində gedən döyüşlərdə xüsusi igidlik nümayiş etdirib.

Kiçik çavuş Əhmədov Yusif Ələsgər oğlu 19 sentyabr 2023 –cü il tarixdə Qarabağda aparılan lokal xarakterli antiterror tədbirlərilə bağlı keçirilən əməliyyatlar zamanı xidməti borcunu yerinə yetirərkən qəhrəmancasına Şəhid olub.

Azərbaycan Respublikası Prezidentinin müvafiq Sərəncamı ilə Azərbaycan Respublikasının ərazi bütövlüyünün təmin olunmasında yüksək peşəkarlıq, şücaət və mərdlik göstərdiyinə, öz xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqləndiyinə görə Kiçik çavuş Əhmədov Yusif Ələsgər oğlu şəhadətindən sonra 3-cü dərəcəli “Vətənə Xidmətə Görə” ordeni ilə təltif edilib.

Fəxri Nəsirli
AYMEDİACOMPANY.AZ