Dövlət Dəniz və Liman Agentliyində (DDLA) həyata keçirilən islahatların davamı olaraq
dənizçilərə sertifikatların (diplomların) verilməsi prosesinin sadələşdirilməsi istiqamətində
daha bir yeniliyə imza atılıb.

Belə ki, gəmilərin komandir heyəti üzvlərinə sertifikatların (diplomların) ilk dəfə verilməsi,
həmçinin yenilənməsi üzrə sənəd qəbulu və hazır sənədlərin verilməsi prosesi cari ilin 14
aprel tarixindən etibarən “Bakı KOB evi”ndə aparılacaq.

Komandir heyəti üzvlərindən sertifikatların (diplomların) ilk dəfə verilməsi, həmçinin
yenilənməsi üçün aşağıdakı sənədlər tələb olunur.

– şəxsiyyəti təsdiq edən sənəd;
– təhsil diplomu;
– sertifikat (diplom) (əgər varsa);
– vəzifə üzrə tələb olunan xüsusi hazırlıq şəhadətnamələri;
– Agentlik tərəfindən tanınan tibb müəssisələri tərəfindən verilmiş “Dənizçinin tibb
sertifikatı”;
– üzmə haqqında arayış və ya təcrübə jurnalı;
– dənizçinin qeyd kitabçası (əgər varsa);
– ümumvətəndaş pasportu və ya dövlət sərhədindən hərəkəti barədə sənəd (ehtiyac
olarsa);
– 3x4 sm ölçüdə, ağ fonda, 4 ədəd rəngli fotoşəkil;
– dövlət rüsumunun ödənildiyini təsdiq edən sənəd;
Qeyd edək ki, imtahanı müvəffəqiyyətlə keçmiş namizədlərə müvafiq sertifikatlar (diplomlar)
imtahanın keçirildiyi tarixdən etibarən beş iş günü ərzində hazırlanaraq təqdim olunacaq.

Xatırladaq ki, Dövlət Dəniz və Liman Agentliyi tərəfindən 2024-cü ilin 19 avqust tarixindən
müddətsiz xüsusi hazırlıq şəhadətnamələrinin, 30 sentyabr tarixindən isə gəmilərin sıravi
heyət üzvlərinə sertifikatların (diplomların) verilməsi və yenilənməsi üzrə sənəd qəbulu, cari
ilin 3 mart tarixindən isə təlimlərdə iştirak etmədən xüsusi hazırlıq şəhadətnamələrinin
yenilənməsi üçün sənəd qəbulu, həmçinin hazır sənədlərin təhvil verilməsi prosesi “Bakı KOB
evi”ndə həyata keçirilir.