Dövlət Dəniz və Liman Agentliyi (DDLA) dənizçilərin hazırlıq prosesinin milli və
beynəlxalq tələblərə uyğunlaşdırılması istiqamətində bır sıra islahatlar həyata
keçirməkdədir.

Belə ki, dənizçilik ixtisasları üzrə tədris yalnız peşə təhsili müəssisəsi statusuna
malik, lisenziyalaşdırılmış və akkreditasiyadan keçmiş tədris mərkəzləri tərəfindən
həyata keçirilə bilər.

Tədris proqramları isə “Dənizçilərin hazırlanmasına, onlara diplom verilməsinə və
növbə çəkməyə dair” (DHDNÇ) Beynəlxalq Konvensiyanın və Beynəlxalq Dəniz
Təşkilatının (BDT) model kurslarının tələblərinə uyğun hazırlanmalı, həmçinin
dənizçilərin bilik, bacarıq və səriştələrinin beynəlxalq standartlara uyğun inkişafını təmin
etməlidir.

Bununla bağlı, Agentlik tərəfindən 2024-cü ilin 23 avqust tarixində təlim-tədris
mərkəzlərinə sirkulyar məktub ünvanlanıb.

Qeyd edək ki, cari ilin 1 iyun tarixindən etibarən ixtisasartırma və sıravi heyət
hazırlığı kurslarını peşə təhsil müəssisəsi və ya əlavə təhsil fəaliyyəti üçün lisenziya
əldə etməyən, eyni zamanda akkreditasiyasız şəkildə fəaliyyət göstərən təlim-tədris
mərkəzlərini bitirən şəxslər Agentliyin təşkil etdiyi imtahanlara buraxılmayacaq və buna
uyğun olaraq şəhadətnamə və ya sertifikat (diplom) əldə edə bilməyəcəklər.

Həmçinin, cari ilin 1 iyun tarixindən sonra əlavə təhsil müəssisələrində tədrisi başa
vuran müdavimlərin Agentlik tərəfindən təşkil olunan imtahanlara buraxılması məsələsi
yalnız “Təhsil haqqında” Azərbaycan Respublikası Qanununun 24-cü maddəsində
nəzərdə tutulmuş tələblərə uyğun olaraq həyata keçiriləcək. Qeyd olunan maddəyə
əsasən, yalnız ali, orta ixtisas və ya peşə təhsili pillələrindən birini uğurla bitirən
müdavimlər imtahanlarda iştirak etmək hüququ qazanacaqlar.

Qeyd olunan tələblərin icrası ölkəmizdə dənizçilərin hazırlıq səviyyəsinin
yüksəldilməsinə, beynəlxalq standartlara cavab verən təlim-tədris prosesinin
qurulmasına və dəniz təhlükəsizliyinin təmin olunmasına xidmət edir.