Şair Rüstəm Məbudoğlu (Aslanov Rüstəm Məbud oğlu) erkən yaşlarından ədəbiyyata və poeziyaya böyük maraq göstərib. Onun yaradıcılıq nümunələri uzun illər ərzində İsmayıllıda nəşr olunan qəzetlərdə, eləcə də respublikanın müxtəlif dövri mətbuat orqanlarında dərc olunub.
Məhsuldar yaradıcılıq fəaliyyəti nəticəsində müəllifin “Görən qardaşımı fələk neylədi” və “Məhəbbət dünyadır, axı mən kiməm” adlı şeir kitabları oxuculara təqdim edilib.
Rüstəm Məbudoğlu Azərbaycan Yazıçılar Birliyinin üzvü, Prezident təqaüdçüsü və “Qızıl Qələm” media mükafatı laureatıdır. O, İsmayıllının zəngin ədəbi mühitinin tanınmış simalarından biri olmaqla yanaşı, “Dağ çiçəkləri” ədəbi məclisinin daimi iştirakçısı, “İsmayıllı Yazarları” ədəbi-ictimai birliyinin təcrübəli üzvlərindəndir.
Şairin yaradıcılığı sadə və səmimi poetik dili ilə seçilir. Onun qələmə aldığı əsərlərdə Vətən sevgisi, saf məhəbbət, zəhmətsevərlik, halallıq və insanı düşündürən həyat hadisələri əsas mövzu kimi diqqəti cəlb edir. Bu xüsusiyyətlər oxucunu milli-mənəvi dəyərlərə sadiq qalmağa və həyatın gözəlliklərini duymağa sövq edir.
Rüstəm Məbudoğlunun bu günlərdə işıq üzü görən “Yollar ayrıcında” adlı üçüncü şeir kitabında son illərdə qələmə aldığı seçmə şeirlər toplanıb. İnanırıq ki, yeni nəşr də oxucular tərəfindən rəğbətlə qarşılanacaq və müəllifin yaradıcılıq yolunda növbəti uğurlarına çevriləcək.
Şairə yeni yaradıcılıq nailiyyətləri arzulayır, əminliklə inanırıq ki, o, “Yollar ayrıcında” həmişə uğura aparan yolu seçəcək.
Şahməmməd Soltanov
“İsmayıllı Yazarları” ədəbi-ictimai birliyinin sədri
