Mənzil təminatı, yaşayış məskənləri və iqlim fəaliyyəti təcrid olunmuş şəkildə nəzərdən keçirilə bilməz. Bunlar bir-biri ilə sıx bağlıdır və dayanıqlı şəhər inkişafı üçün birbaşa əhəmiyyət kəsb edir.
Bu sözləri “Bakı İqlim Fəaliyyəti Həftəsi 2026” çərçivəsində keçirilən “İqlim fəaliyyətinin şəhər ölçüsünün inkişaf etdirilməsi: WUF13-dən COP31-ə doğru” mövzulu panel sessiyada xarici işlər nazirinin müavini, COP29-un baş danışıqçısı Yalçın Rəfiyev deyib.
O vurğulayıb ki, Azərbaycan qlobal şəhər-iqlim sinergiyasına töhfə verməyə və regional-beynəlxalq platformalara ev sahibliyinə davam etməyə hazırdır. Praktik baxımdan, Azərbaycanın iqlimə dözümlü şəhər infrastrukturu quruculuğu, eləcə də yaşıl şəhər inkişafı sahəsindəki təcrübəsini bölüşə bilər.
“COP31-də biz münaqişədən və fəlakətdən sonrakı iqlimə dözümlü şəhər inkişafı və yenidənqurma sahəsindəki uğurlu təcrübəmizi bölüşəcəyik. Azərbaycan və Türkiyənin bu sahələrdəki nailiyyətləri oxşar çətinliklərlə üzləşən digər tərəflər üçün dəyərli dərs və praktik təcrübədir”, - deyə nazir müavini bildirib.
