Oktyabrın 4 - də Bakının Nizami rayonunda Azərbaycanın Milli Qəhrəmanı Yuriy Kovalyovun adını daşıyan 229 nömrəli məktəbin həyətində təntənəli şəkildə onun büstünün açılışı oldu.
Açılışda Milli Məclisin deputatları, Nazirliklərin nümayəndələri, rayon rəhbərliyi, DİN - in nümayəndələri, Milli Qəhrəmanın döyüş yoldaşları, qazilərimiz, rayon ictimaiyyəti, məktəbin kollektivi və Milli Qəhrəmanın ailə üzvləri iştirak etmişlər.
Tədbir Azərbaycan bayrağının gətirilməsi ilə başladı və Dövlət himnimiz səsləndi.
Himnin oxunuşundan sonra Yuriy Kovalyovun ailə üzvləri tərəfindən büstün açılışı oldu.
Mərasim iştirakçılarının çıxışları ilə tədbir davam etdirildi.
Azərbaycanın Milli Qəhrəmanı Yuriy Kovalyovun həyat yoluna nəzər salaq :

Yuri Kovolyov 29 may 1965 - ci ildə Göyçay rayonunda anadan olmuşdur.
1972-ci ildə ailəliklə Rusiyanın Krasnodar vilayətinə köçmüş, beş ildən sonra isə Bakıya qayıtmışlar. O, orta təhsillə yanaşı, idmana da böyük maraq göstərirdi.
O, 11 yaşında olarkən idman ustası və Azərbaycanın Əməkdar məşqçisi Ravil Cəlilovun rəhbərliyi ilə futbol məktəbinin ixtisaslaşdırılmış sinfində sevdiyi idman növünün sirlərinə yiyələnmişdir. Hələ futbol məktəbində oxuyarkən bacarıqlı qapıçı kimi formalaşan Yuriy öz çevikliyi ilə yoldaşları arasında fərqlənirdi. О, iki dəfə Bakı çempionu olmuş, Respublika və Ümumittifaq turnirlərində Bakının gənclərdən ibarət yığma komandasının qapıçısı olmuşdur.
1981 - ci ildə Bakının Nizami rayonundakı 229 nömrəli orta məktəbi bitirmişdir.
1982-ci ilə kimi Azərittifaqın reklam istehsalat kombinatında çalışmışdır.1983-cü ildə Pribaltika hərbi dairəsinin sıralarına çağırılmış, hava desant qoşunlarında xidmət etmiş və 1985-ci ildə ordudan tərxis olunmuşdur.1987-ci ildə Bakı Qırmızı bayraqlı Qara Dəniz Hərbi Donanmasının 109 saylı Miçmanlar və Praporşiklər məktəbinə daxil olmuşdur.
O, 1990-ci il sentyabr ayının 15-də Daxili İşlər Nazirliyinin Xüsusi təyinatlı Polis Dəstəsinə qəbul edilir, Azərbaycanın bir çox döyüş bölgələrində mərdliklə vuruşur. Kovalyov Goranboy rayonunun kəndlərinin azad edilməsində böyük şücaət göstərmişdir. Düşmən tərəfindən " Əsədovun bandası " adlandırılan XTMD-nin əməkdaşları ilə düşmənin rahatlığını əlindən almışdır. Düşmən snayperləri onu dağlar, daşlar arasında da axtarırdı. Başına yüz min rubl qiymət qoyulmuşdu. General Məhəmməd Əsədovun və nazir müavini polkovnik Ramiz Məmmədovun Yuriy Kovalyova böyük rəğbəti var idi və Kovalyov onları tez-tez müşayiət edirdi.
1991-ci ilin aprel ayında döyüş zonalarında fərqlənmiş bir qrup OMON-çunu mükafatlandırmaq üçün Daxili İşlər nazirinin müavini Rəhim Quliyev və Nazirliyin şöbə rəisi Həmid Cəfərov XTMD-yə gəlmişdilər. Mərasimdə çıxış edən Həmid Cəfərov 1991-ci il aprel ayının 3-də Respublikanın xalq deputatlarından Aydın Məmmədovun, Tamerlan Qarayevin, Ramiz Fətəliyevin və bir sıra rəsmi şəxslərin və özünün helikopter qəzasına uğramalarından söhbət açaraq helikopterdəkilərin xilas olmasında Yuriy Kovalyovun yüksək peşə səriştələrinin nümayiş etdirilməsini xüsusilə qeyd etdi. Söhbət zamanı Yuriy ünvanına deyilən təriflər qarşısında təvazökarcasına susdu və sonra qeyd etdi ki, " mən də Azərbaycanlıyam, bu torpağın çörəyini yemişəmsə, suyunu içmişəmsə, ona da xidmət etməliyəm".
Onun rus olması xarici jurnalistləri təəccübləndirirdi. Yuriy Kovalyov Şuşanın Qaladərəsi kəndində Azərbaycan jurnalistlərini müşayiət edərkən gözlənilmədən ora Ermənistan helikopteri enmiş və helikopterdəki xarici müxbirlər onunla görüşmək istəmişlər. Xarici jurnalistlər Kovolyovu suala tutmuşlar:

- Siz russunuzmu?

- Bəli, mən rusam, Azərbaycan isə vətənimdir!

1991-ci il sentyabrın 13-ü Yuriy Kovalyov Bakıdan çıxmış, həlak olduğu gündən 2 gün əvvəl sonuncu dəfə evə zəng vurub, hal - əhval tutmuşdur.
1991-ci il 3 oktyabrda digər OMON-çu dostları Sergey Barınin, Andrey Kudenin, Aleksandr Abramovla birlikdə Ağdam ərazisində Xocavənddən növbəti tapşırıqdan qayıdanda içində olduqları UAZ-ı ermənilər atəşə tuturlar. Yuriy Kovalyov həlak olur, Kudenin isə ağır yaralanır. Ermənilər UAZ-a yaxınlaşanda partlayış baş verir. Ölüm ayağında belə bir neçə düşməni məhv edir. O, Bakı şəhərində Şəhidlər xiyabanında dəfn edilmişdir.
Yuriy Kovalyov Tamara xanım ilə ailə həyatı qurmuş və ömrünün sonuna qədər onunla evli idi. Regina və Yulia adlı qızları yadigar qalıb.
Bakı şəhərindəki 229 nömrəli orta məktəb onun adını daşıyır. Hal - hazırda onun 2 nəvəsi və qardaşının övladları o məktəbdə təhsil alırlar.

Azərbaycan Respublikası Prezidentinin 6 iyun 1992 - ci il tarixli 831 saylı fərmanı ilə Yuriy Kovalyov ölümündən sonra Azərbaycanın Milli Qəhrəmanı adına layiq görülmüşdür.
Tədbirin sonunda qonaqlar məktəbin həyətində ağacəkmə aksiyası keçirmişlər.
Yuriy Kovalyov xalqımızın qan yaddaşında daim yaşayacaqdır!

ABİL İSLAM
Şair - Jurnalist
Prezident təqaüdçüsü,
İctimai Xəbər Agentliyinin direktor müavini.

(Fotolar müəllifindir)