Həqiqətən də Azərbaycan öz torpaqlarının işğaldan azad edilməsi üçün apardığı bu Vətən müharibəsində əldə etdiyi tarixi qələbəsi ilə, əslində, bütün Qafqazı erməni faşizmindən xilas etdi. Eyni zamanda da bu qələbə erməni faşizminin bütün bəşəriyyət üçün nə dərəcədə təhlükəli bir cərəyan olduğunu bütün dünyaya göstərdi.

Ermənistanın sentyabrın 27-də növbəti hərbi təxribatından sonra Azərbaycan Ordusunun 44 gün davam edən əks-hücum əməliyyatı noyabrın 10-da tarixi qələbəmizlə başa çatdı. Həmin gün Azərbaycan, Rusiya prezidentləri və Ermənistanın baş naziri tərəfindən imzalanan birgə bəyanatla silahlı
qüvvələrimizin hərbi cəbhədəki möhtəşəm qələbəsi diplomatik sahədə də rəsmiləşdirildi. Beləliklə, xalqımızın 30 il çəkən torpaq həsrətinə son qoyuldu, ədalət bərpa edildi. Eyni zamanda, Prezident, Ali Baş Komandan İlham Əliyev qalib sərkərdə, Azərbaycan Ordusu ən güclü ordu, xalqımız isə ən böyük, məğrur, yenilməz xalq olduğunu bir daha təsdiqlədi.

İmzalanan birgə bəyanata əsasən Kəlbəcər noyabrın 15-də Azərbaycana qaytarılmalı idi. Lakin Ermənistan tərəfi ordunun və qanunsuz olaraq yerləşdirdiyi insanların rayondan çıxarılması üçün əlavə 10 gün vaxt istədi. Buna görə də Azərbaycan dövləti öz humanist xarakterini bir daha nümayiş etdirməklə, Rusiya Prezidenti Vladimir Putinin xahişini nəzərə alaraq, müddəti noyabrın 25-dək uzatdı və həmin gün Kəlbəcər rayonu işğaldan xilas edildi.

Bu məqsədlə “Bizim Ocaq” məkanında aparıcı və müğənni Nizami Kəlbəcərlinin təşkilatçılığı ilə Kəlbəcərin işğaldan azad edilmisinin 1 illiyinə həsr
edilmiş bayram tədbiri keçirilmişdir. Tədbirə Azərbaycanın tanınmış incəsənət insanları dəvət edilmişdir. Tədbirə Xalq Artisti “Şərəf” və “Şöhrət” ordenli
Niyaməddin Musayev, Aşıq Zülfiyyə İbadova, Aşıq Əli Kəlbəcərli, mügənni Tağı Salehoğlu, “Lalə” qızlar ansambılı və solist Rəhilə Bəndəliyeva, əməkdar artist Babək Niftəliyev, Vokalist Şahin İsmayılov, gitara ifaçısı İlqar Babayev, qarmon ifaçısı Habil Şınıxlı və başqaları dəvət edilmişdir. Tədbirin aparıcısı Nizami Kəlbəcərli tədbirə gələn qonaqları salamalayaraq bu tarixi gün haqqında ətraflı məlumat verdi.

Tədbir iştirakçılarından Niyaməddin Musayev, Tağı Salehoğlu, Aşıq Əli Kəlbəcərli, Babək Niftəliyev Kəlbəcərlə bağlı xatirələrini təqbir iştirakçıları ilə bölüşdülər. Tədbirə dəvət edilmiş “Dəmir Yumruq Alfa -A” MMC-nin təsisçisi şairə Ülviyyə xanım Əsədova Kəlbəcərə həsr etdiyi şeri tədbir iştirakçılarına çatdırdı. Daha sonra sənət adamları növbəli şəkildə bu gün münasibəti ilə ürək sözlərini bildirdilər və rəngarəng musiqili anlar yaşandı.

“AY MEDİA COMPANY”
ALMAZ YAŞAR