4–7 dekabr 2025-ci il tarixlərində Türkiyənin Bursa şəhərində keçirilən V Dünya Çempionatında Azərbaycan idmançıları möhtəşəm nəticələr göstərərək böyük uğura imza atıblar. 21 ölkədən 400-dən çox idmançının iştirak etdiyi mötəbər turnirdə ölkəmiz 50 idmançı və 4 hakimlə təmsil olunub.
Azərbaycan təmsilçiləri Alpaqut döyüş sənətinin ayça, batur, caymaz və qurşaq sistemləri üzrə mübarizə apararaq ümumilikdə 46 medal qazanıblar. Medal bölgüsü belədir:
26 qızıl medal (1-ci yer)
10 gümüş medal (2-ci yer)
10 bürünc medal (3-cü yer)
Turnirdə Azərbaycan komandası xüsusilə caymaz sistemi üzrə 1-ci yeri əldə edərək beynəlxalq arenada gücünü bir daha nümayiş etdirib.
Ümumi komanda hesabında isə birinci yeri Türkiyə, ikinci yeri İraq, Azərbaycan millisi isə 3-cü yeri qazanıb.
Azərbaycan milli komandasının üzvü, 16–17 yaşlı idmançı Hüseynov Elman Rəhman oğlu 65 kq çəki dərəcəsində bütün rəqiblərinə qalib gələrək Dünya Çempionu adına layiq görülüb. Bu uğur gənc idmançımızın əzmkarlığının, hazırlığının və Alpaqut döyüş sənətinə olan bağlılığının bariz nümunəsidir.
Bu böyük nailiyyət, Azərbaycan idmançılarının yüksək peşəkarlığını və ölkəmizin Alpaqut döyüş sənəti üzrə dünya miqyasında nüfuzunu bir daha təsdiqlədi.
İdmançılarımıza göstərilən dəstəyə görə Azərbaycan Gənclər və İdman Nazirliyinə və Azərbaycan Milli İdman Növləri Assosiasiyasına təşəkkür edirik.
Azərbaycan idmançılarının uğurları davam edir!

Fərid Əmiraslanov
"AYMEDİACOMPANY.AZ" mədəniyyət işləri üzrə direktor müavini