Azərbaycan Dillər Universitetinin (ADU) nəzdində Konfutsi İnstitutunun yay onlayn lektoriya fəaliyyəti çərçivəsində “Yay məktəbi: Ruh - Jonqyuan festivalı” mövzusunda mühazirə oxunub.

Bu barədə AZƏRTAC-a institutdan bildirilib. Konfutsi İnstitutunun direktoru Rafiq Abbasov festivalın tarixi haqqında məlumat verərək bunun Şərqi Asiya ölkələrində təşkil edilən ənənəvi bir “Daoizm və Buddist festivalı” olduğunu vurğulayıb. O, Çin təqvimində yeddinci ayın on beşinci gününün “Ruh günü” adlandırıldığını və ümumiyyətlə, yeddinci ayın “Ruh ayı” olaraq qəbul edildiyini və bu ayda dünyasını dəyişmiş əcdadları da daxil olmaqla, ruhların yer üzünə çıxdığına inanıldığını seminar iştirakçılarının diqqətinə çatdırıb.

R.Abbasov “Ruh festivalı”nın inanclarından danışaraq, bu ay ərzində cəhənnəmin qapılarının açıldığını, ruhların yemək və əyləncə üçün Yer üzündə sərbəst gəzdiklərini bildirib. O qeyd edib ki, yeddinci ayın on dördüncü günü ruhlar üçün böyük ziyafət verilir, ruhları razı salmaq üçün masalara yemək düzülür, unudulmuş əcdadların itirilmiş ruhlarını axirət həyatına simvolik olaraq yönləndirmək üçün lotus şəkilli fənərlər yandırılaraq çaylara və dənizlərə buraxılır.