Əbülqasım Hüseynzadə 1890-cu il sentyabrın 25-də Bakıda anadan olub. O, orta təhsilini 6 sinifli şəhər məktəbində alıb, sovet hakimiyyətindən əvvəl Bakı tütün fabrikində baş mühasib və başqa vəzifələrdə işləyib. Sovet Hakimiyyəti qurulandan sonra Əbülqasım Hüseynzadə 1920-1975 illərdə müxtəlif müəssisələrdə baş mühasib olub. O, eyni zamanda qiyabi yolla natamam ali təhsil alıb.

Əbülqasım Hüseynzadənin Azərbaycan folklorunun toplanması və nəşri sahəsində mühim xidmətləri vardır. Onun "Atalar sözləri" (1926) kitabı Sovet hakimiyyəti illərində nəşr olunmuş ilk Azərbaycan atalar sözü kitabıdır. Sonrakı illərdə o, "Atalar sözü" (1938, 1949, 1956, 1965, 1981, 1986), "El sözləri" (1944), "Hikmətli sözlər" (1961), "Müdrik sözlər" (1970), "Müxtəsər rusca-azərbaycanca və azərbaycanca-rusca atalar sözü lüğəti" (B.Tahirbəyovla birgə, 1983), "Atalar sözü və zərb-məsəllər" və başqa kitabları çapa hazırlayaraq nəşr etdirib.

Onun topladığı atalar sözləri,məsəllər rus və ukrain dillərinə tərcümə olunub.

Azərbaycan folkloru sahəsində göstərdiyi xidmətə görə ona 1981-ci ildə “Azərbaycanın Əməkdar mədəniyyət işçisi” fəxri adı verilib.

Əbülqasım Hüseynzadə 1988-ci il sentyabrın 2-də Bakıda vəfat edib.