16 dekabr 1727-ci ildə Osmanlı impartorluğunda İbrahim Müteferrika tərəfindən ilk türkcə kitab olan "Vankulu lüğəti" basıldı.
1773-cü ilin 16 dekabrında Amerika Birləşmiş Ştatlarındakı ingilis koloniyalarında London hakimiyyətinə qarşı üsyan baş verdi. "Boston çay qonaqlığı" adlanan hadisədə çay vergisinə etiraz edənlər Boston limanındakı 3 İngiltərə gəmisinə girərək çayları qutulardan dənizə tökdülər.
Tanınmış Azərbaycan boyakarı, xalq rəssamı Qəzənfər Xalıqov 1898-ci ilin 16 dekabrında Bakı yaxınlığındakı Qobu kəndində anadan olub. Azərbaycan Dövlət Rəssamlıq Texnikumunu bitirdikdən sonra boyakarlıq, qrafika və teatr rəssamlığı sahəsində fəaliyyət göstərib. Yaradcılığının erkən dövründə “Molla Nəsrəddin” jurnalı və “Gənc işçi” qəzeti üçün karikaturalar çəkib. Nizami Gəncəvinin 800 illiyi ilə əlaqədar dahi şairin portretini yaradıb, “Xosrov və Şirin” poemasına illüstrasiyalar çəkib. Qəzənfər Xalıqov teatr və kino rəssamlığı sahəsində də fəaliyyət göstərib. (1898-1981)
1934-cü il 16 dekabr tarixində görkəmli şair, tərcüməçi, Əməkdar İncəsənət Xadimi Tofiq Bayram anadan olub (1934-1991). Əmək fəaliyyətinə “Azərbaycan müəllimi” qəzeti redaksiyasında şöbə müdiri kimi başlayan T.Bayram sonralar Azərbaycan Dövlət Televiziya və Radio Verilişləri Komitəsində, Dövlət Opera və Balet Teatrında işləyib. Bir sıra tərcümələrin müəllifi olan T.Bayram Aleksandr Tvardovskinin “Yaddaşın hökmü” poemasının tərcüməsinə görə Maksim Qorki adına Azərbaycan Dövlət mükafatı laureatı fəxri adına layiq görülüb. T.Bayram “Ana təbəssümü”, “Mənim şair xalqım”, “Sizi düşünürəm”, “Azərbaycan dünya gəzir” kimi bur sıra əsərlərin müəllifidir.
Azərbaycanın Milli Qəhrəmanı Salatın Əsgərova 1961-ci ilin bu günü dünyaya gəlib. Uzun illər “Molodyoj Azerbaydjana” qəzetində çalışan jurnalist 1991-ci ildə Qarabağ münaqişəsilə əlaqədar yazılar hazırlamaq üçün Laçından Şuşaya gedərkən silahlı erməni ekstremistləri tərəfindən qətlə yetirilib. Xalq şairi Nəbi Xəzri “Salatın” rekviyem poemasını Salatın Əsgərovanın unudulmaz xatirəsinə həsr edib. (1961-1991)
1967-ci ilin 16 dekabrında Amerika Birləşmiş Ştatlarının Stanford Universitetinin alimləri DNT zəncirini açıqlayıb təhlil etdilər.
Bu gün dünya caz musiqisinin iknişafında əvəzsiz xidmətləri olan bəstəkar və pianoçu Vaqif Mustafazadənin xatirə günüdür. Asəf Zeynallı adına musiqi məktəbini bitirdikdən sonra Gürcüstan Dövlət Filarmoniyasında “Qafqaz” caz triosunu yaradıb. Azərbaycan Dövlət Estrada Orkestrinin solist-pianoçusu olan Vaqif Mutafazadə “Leyli” adlı ilk qadın vokal kvartetinə, sonra isə “Sevil” vokal-instrumental ansamblına rəhbərlik edib. Orijinal ifaçılıq üslubuna malik olan Vaqif Mustafazadə Azərbaycan muğamları və xalq havaları üzərində ustalıqla çalışaraq, onları caz musiqisi ilə sintez edərək yeniliyə imza qatıb. O, dəfələrlə beynəlxalq müsabiqələrin qalibi və mükafatçısı olub. Vaqif Mustafazadə 1979-cu ilin 16 dekabrında 39 yaşında dünyasını dəyişib. (1940-1979)
Bu gün Qazaxıstan dövləti və xalqının milli bayramıdır. Keçmiş SSRİ-dən 1991-ci ildə ayrılan bu respublikanın istiqlaliyyəti dekabrın 16-da bəyan olub.
1991-ci il 16 dekabr tarixində Naxçıvan Muxtar Respublikası Ali Məclisinin Heydər Əliyevin sədrliyi ilə keçən iclasında 31 dekabrın dünya azərbaycanlılarının həmrəylik bayramı kimi qeyd olunması barədə qərar qəbul edilib. Ali Məclis bununla bağlı qanunvericilik aktının qəbul olunması üçün ölkə parlamentinə - Ali Sovetə müraciət edib. Dekabrın 25-də Azərbaycan Respublikası Ali Sovetinin Milli Şurası (parlamentin 50 deputatdan ibarət daimi fəaliyyət göstərən orqanı) müraciəti nəzərə alaraq dekabrın 31-nin Dünya Azərbaycanlılarının Həmrəylik Günü elan olunması barədə qanun qəbul edib.
1991-ci il 16 dekabr tarixində Azərbaycan Respublikası Dövlət Sərhədini Mühafizə Komitəsi yaradılıb. Müstəqillik əldə etdikdən sonra -1991-ci il dekabrın 16-da Azərbaycan Respublikası Dövlət Sərhədini Mühafizə Komitəsi təsis edilib və ölkəmizin sərhədlərini milli qüvvələrimiz qorumağa başlayıb. 1993-cü il martın sonu-aprelin əvvəllərində keçmiş SSRİ sərhədçiləri Azərbaycanı tərk ediblər.
16 dekabr Azərbaycan Respublikası Fövqəladə Hallar Nazirliyi işçilərinin peşə bayramı günüdür. 2005-ci ildə Prezident İlham Əliyev Azərbaycan Respublikasının Fövqəladə Hallar Nazirliyinin yaradılması barədə Sərəncam imzalayıb. Sərəncama əsasən, Dövlət Sənayedə İşlərin Təhlükəsiz Görülməsinə Nəzarət və Dağ-Mədən Nəzarəti Komitəsi, Material Ehtiyatları Komitəsi ləğv edilərək onların funksiyaları Fövqəladə Hallar Nazirliyinə verilib. Bundan əlavə, Müdafiə Nazirliyinin Mülki Müdafiə İdarəsi, DİN-in Dövlət Yanğından Mühafizə İdarəsi, Dövlət Sularda Xilasetmə Xidməti, “İzotop” kombinatı, Dövlət Tikinti və Arxitektura Komitəsinin Tikilməkdə olan Obyektlərin Birləşmiş Müdiriyyəti yeni nazirliyin tabeliyinə verilib. Ölkə başçısının 2006-cı ildə imzaladığı sərəncama əsasən, dekabrın 16-sı Fövqəladə Hallar Nazirliyi işçilərinin peşə bayramı günü kimi qeyd edilir.
2011-ci il 16 dekabr tarixində Azərbaycanın tanınmış müğənnisi, SSRİ Xalq Artisti, “Şöhrət” ordenli Firəngiz Əhmədova vəfat edib (1967-2011). F.Əhmədova 1946-1951-ci illərdə Azərbaycan Radiosu Xorunun, 1951-1988-ci illərdə isə Azərbaycan Dövlət Opera və Balet Teatrının solisti olub. Sənətkar Azərbaycan, rus və Qərbi Avropa bəstəkarlarının operalarında müvəffəqiyyətlə çıxış edib. M.Maqomayevin “Nərgiz” operasında Nərgiz, “Şah İsmayıl” operasında Gülzar, Ü.Hacıbəylinin “Koroğlu” operasında Nigar, F.Əmirovun “Sevil” operasında Sevil kimi bir sıra rolları çox böyük ustalıqla yaradıb. F.Əhmədova Azərbaycan romanslarını, eləcə də klassik rus bəstəkarlarının romanslarını, bir sıra filmlərdə mahnıları sənətkarlıqla ifa edib. 2003-cü ildə Xalq Artistinə həsr olunmuş “Firəngiz Əhmədova” sənədli filmi çəkilib.
