1768-ci il 9 yanvar tarixində Londonda ilk dəfə olaraq Filip Astley müasir sirk təşkil etdi.
9 yanvar 1792-ci ildə Rusiya ilə Türkiyə arasında 1787-ci ildə başlanan və Osmanlının məğlubiyyəti ilə nəticələnən müharibənin yekununa dair Yassı sülhü imzalanıb. Krım da daxil olmaqla Qara dənizin şimalındakı ərazilər, habelə Dnestr və Kuban çayı ətrafındakı torpaqlar Rusiyanın nəzarətinə keçib.
9 yanvar 1905-ci ildə Peterburqda “Qanlı bazar” qırğını baş verib. Çar II Nikolaya şikayət ərizələrini təqdim etmək istəyən minlərlə fəhlə keşiş Qaponun təhriki ilə Qış sarayına doğru irəliləyərkən qoşun hissələrinin gülləbaranı ilə qarşılanıb. “Qanlı bazar”da, müxtəlif mənbələrə görə, 2 mindən 5 minədək adam ölüb. Bu olaylar Rusiyada 1905-ci il inqilabının başlanması üçün təkan oldu.
1951-ci il 9 yanvar tarixində BMT-nin Nyu-Yorkdakı mənzil qərargahının rəsmi açılışı oldu.
Azərbaycan Milli Qəhrəmanı Mətləb Quliyev 1959-cu ilin bu günü Beyləqanda dünyaya gəlib. Cəmşid Naxçıvanski adına Hərbi Məktəbi və Azərbaycan Pedoqoji İnstitutunu bitirən M.Quliyev 1992-ci ilin ilin avqustundan Ağdam bölgəsində erməni-rus birləşmələrilə döyüşdə şücaət göstərib və qəhrəmancasına həlak olub. (1959-1992)
1960-cı il 9 yanvar tarixində Sovet İttifaqının texniki dəstəyi ilə Misirdə Asuan bəndinin tikintisinə başlanıldı.
Panama kanalı və ətrafının idarəsi ilə bağlı yerli xalq və ABŞ hökuməti arasında yaranan anlaşılmazlıq 1964-cü ilin 9 yanvarında silahlı qarşıdurmaya çevrildi. Hadisələr zamanı 21 panamalı və 3 Amerika əsgəri öldü.
Türkiyə xalqının Milli Qurtuluş Savaşını "Türkün odla imtahanı", "Alovdan köynək" romanlarında əbədiləşdirən yazıçı Xalidə Edip Adıvar 1964-cü ilin 9 yanvarında 80 yaşında İstanbulda dünyasını dəyişib. O, həyat yoldaşı Adnan Adıvarla birgə Qurtuluş Savaşında iştirak etmiş, onbaşı, çavuş rütbələrini almış, müharibədki bir çox hadisələrin canlı şahidi olmuşdu. (1884 - 1964)
1991-ci ildə Azərbaycanın Qarabağ torpağının Laçın-Şuşa yolunda “Molodyoj Azerbaydjana” qəzetinin müxbiri Salatın Əsgərova və üç rus hərbçisi erməni silahlıları tərəfindən qətlə yetirildi.
1992-сi il 9 yanvar Serbiya müstəqilliyini elan etdi.
9 yanvar 1996-cı ildə çeçen komandirlərindən Salman Raduyevin dəstəsi Dağıstanın Kizlyar şəhərinə hücum edib. Terrorçular bir neçə gün şəhəri əllərində saxladılar. Rusiyanın güc strukturlarının uğursuz antiterror əməliyyatı nəticəsində 70-dən çox insan həlak oldu, Raduyevin dəstəsi isə aradan çıxa bildi. 2000-ci ildə ələ keçirilən Raduyevə məhkəmədə ömürlük həbs kəsildi. İki il sonra o, Perm vilayətindəki həbsxanada öldü.
2005-ci il 9 yanvar tarixində Mahmud Abbas Fələstin Muxtariyyətinin başçısı seçildi.
2007-ci il 9 yanvar tarixində Stiv Cobs San-Fransiskoda iPhone smartfonunu ictimaiyyətə təqdim etdi. Bu smartfon üç cihazın - “iPod”, “İnqilabi mobil telefon” və “İnkişaf etmiş internet smartfon”un funksiyalarını özündə birləşdirir. Nüfuzlu “Time” jurnalı Stiv Cobsun “Biz telefona ikinci həyat verdik” sözlərini təsdiqləyərək 2007-ci ildə bu smartfonu ilin ixtirası adlandırıb.
2016-cı il 9 yanvar tarixində müasir Azərbaycan ədəbiyyatının görkəmli nümayəndəsi, Xalq Şairi Zəlimxan Yaqub vəfat edib (1950-2016). Xalq yaradıcılığından məharətlə bəhrələnərək müasirlərimizin yüksək insani keyfiyyətlərini, ümumbəşəri və milli dəyərləri, tariximizin taleyüklü anlarını özündə əks etdirən əsərlər yaradan Zəlimxan Yaqubun rəngarəng mövzulu şeirləri poeziyamızın inciləri səviyyəsinə qalxaraq Azərbaycan ədəbiyyatında yeni söz kimi qəbul edilib. Onun qəhrəmanlıq ruhu, vətənpərvərlik hissi, azərbaycançılıq məfkurəsi ilə aşılanmış əsərləri əsl vətəndaşlıq mövqeyi nümayiş etdirərək gənc nəslin tərbiyəsində xüsusi əhəmiyyət kəsb edir. Zəlimxan Yaqubun aşıq yaradıcılığını dərindən bilməsi və onu bütün incəlikləri ilə qavraması şeirlərinin lirizmini daha da qüvvətləndirib. Şairin əsərləri bir çox dillərə tərcümə olunub və sənətsevərlər tərəfindən rəğbətlə qarşılanıb.
