Rauf İsrafil oğlu Atakişiyev 1925-ci il iyulun 15-də Göyçayda anadan olub. 1949-cu ildə Moskva Dövlət Konservatoriyasını Konstantin Nikolayeviç İqumnovun sinfi üzrə bitirib və vokal üzrə Antonina Vasilyevna Nejdanovadan dərs alıb. O, təhsil aldığı müddətdə bir sıra dünya şöhrətli musiqiçilərdən - Y.Flier, Y.Milşteyn, Barsovadan əldə etdiyi böyük təcrübə nəticəsində Azərbaycan Dövlət Konservatoriyasında (indiki Ü.Hacıbəyli adına Bakı Musiqi Akademiyası) bir pedaqoq kimi səmərəli fəaliyyət göstərib və özünəməxsus fortepiano ifaçılığı məktəbi yaradıb. Ü.Hacıbəyov adına Azərbaycan Dövlət Konservatoriyasında (indiki Ü.Hacıbəyli adına Bakı Musiqi Akademiyası) uzun illər dərs deyərək, musiqi təhsilinin inkişafı üçün mühüm işlər görüb, Azərbaycan pianoçuluq məktəbinə öz üslubunu və dəst-xəttini gətirib.

1953-cü ildən Azərbaycan Dövlət Konservatoriyasının fortepiano kafedrasının müəllimi, 1969-cu ildən isə həmin kafedranın müdiri vəzifələrində çalışıb.

Rauf Atakişiyev 40 ildən artıq M.F.Axundov adına Opera və Balet Teatrının aparıcı solisti, lirik-dramatik tenor kimi fəaliyyət göstərib. Teatrda Əsgər (“Arşın mal alan”), Lenski (“Yevgeni Onegin”, P.Çaykovski), Faust (“Faust”), Qraf Almaviva (“Sevilya bərbəri”, Coakkino Rossini), Knyaz Sinoda (“Demon”, Anton Rubinşteyn), Hofman (“Hofmanın nağılları”, Jak Offenbax), Malxaz (“Daisi”, Zaxari Paliaşvili), Alfred (“Traviata”, Cüzeppe Verdi), Edmond (“Kornevil zəngləri”, Rober Plaket), Anatoli (“İnsanın taleyi”), Balaş (“Sevil”, F.Əmirov) partiyalarını oxuyub.

Həmçinin “Arşın mal alan” (ikinci redaksiya), “O olmasın, bu olsun” bədii filmlərində onun ecazkar səsi yaddaşlara həkk olunub.

Rəşid Behbudovun ifasında daha çox məşhur olan “Я встретил девушку” (Mən bir qıza rast gəldim) mahnısının ilk ifaçısıdır. Mahnı ilk dəfə 1957-ci ildə Tacikistan SSR-in “Stalinabad” kinostudiyasında çəkilmiş eyniadlı filmdə ifa olunub.

Rauf (Rafiq) Atakişiyev 1994-cü il fevral ayının 3-də Bakı şəhərində vəfat edib.