Şamil Fərzəliyev (Şamil Xurşud) 1934-cü il fevralın 18-də Ucar rayonunda anadan olub. Valideynləri 1918-ci il hadisələri səbəbindən məcburiyyət qarşısında qalaraq Qərbi Azərbaycanın Sisyan rayonunun Ağudi kəndindən Ucar rayonuna köçüblər.

Şamil Xurşud Azərbaycan Dövlət Universitetinin (indiki Bakı Dövlət Universiteti) jurnalistika fakültəsində oxuyan vaxtdan bədii-publisistik məqalələr, televiziya və radio üçün səhnəciklər yazmağa başlayıb. Onun ilk səhnə əsəri də elə o vaxtlar oynanılıb.

Ali təhsilini uğurla başa vurandan az sonra onu Moskvanın İctimai Elmlər Akademiyasına göndərirlər. Orada ikiillik təhsilini başa vurub Vətənə qayıtdıqdan sonra Şamil Xurşud ömrünü yazıb-yaratmağa həsr edir. O, bir müddət Azərbaycan KP MK aparatında təlimatçı vəzifəsində çalışıb. 1972-ci ildə "Azərbaycan gəncləri" qəzetinin redaktoru, 1980-ci ildə isə "Kirpi" satirik jurnalının baş redaktoru vəzifəsinə təyin edilib. O, bu vəzifədə 1986-cı ilin aprelinə kimi işləyib.

Şamil Xurşud yaradıcılığa kiçik səhnə əsərləri yazmaqla başlayıb. Ötən əsrin altmışıncı illərindən başlayaraq oçerk, felyeton, publisistik yazıları ilə respublika mətbuatında çıxış etməyə başlayıb, bir qədər sonra isə hekayələri, povest və pyesləri işıq üzü görüb. Onun "Özüm və özün" ilk felyetonlar kitabı böyük marağa səbəb olmuş, daha sonra isə bir-birinin ardınca "Azarkeş nənə", "Xəstələr", "Naxırçı çörəyi", "Ağaclar kəsilmədi", "Bahar yağışları", "Sən tək deyilsən", Mirzə Şəfi Vazehin həyatından bəhs edən "Bəxtiyar deyil" kitabları nəşr olunub. Müxtəlif illərdə yazdığı səhnə əsərləri Azərbaycan Dövlət Gənc Tamaşaçılar Teatrında, Lənkəran Dövlət Dram Teatrında, İrəvan Dövlət Dram Teatrında tamaşaya qoyulub.

Şamil Xurşud Fərzəliyevin "Səndən sonra" kitabı yazıçının ölümündən sonra "Şərq-Qərb" nəşriyyatı tərəfindən çapdan buraxılıb.

"Qızıl qələm" mükafatı laureatı olub, bir sıra Fəxri Fərman və medallara layiq görülüb.

Şamil Xurşud 1986-cı ilin aprelin 24-də uzun sürən xəstəlikdən sonra Tbilisi şəhərində vəfat edib.