1797-ci il 26 fevral tarixində İngiltərə Bankı ilk funt-sterlinqi tədavülə buraxıb. Funt-sterlinq bir çox ölkələrdə XVIII və XIX əsrlərdə ehtiyat valyuta kimi istifadə edilirdi. İkinci Dünya müharibəsindən sonra ölkədəki ağır iqtisadi vəziyyət funt-sterlinqin mövqeyini xeyli zəiflətdi. Hazırda istifadəsinə görə, dünyanın üçüncü valyutasıdır.

1802-ci ilin bu günü romantizm cərəyanının görkəmli nümayəndəsi, Fransa yazıçısı Viktor Hüqo (Victor Marie Hugo) anadan olub. V.Hüqonun “Səfillər”, “93-cü il”, “Paris Notrdam kilsəsi”, “Gülən adam” romanları, “Mariya Tüdor”, “Kromvel” pyesləri və digər əsərləri dünya ədəbiyyatının ən gözəl nümunələri sırasındadır. (1802-1885)

1815-ci il 26 fevral tarixində Napoleon Bonapart Elba adasından sürgündən qaçıb. 1812-ci ildə Rusiya, 1813-1814-cü illərdə Almaniya ilə müharibədə məğlubiyyətə uğrayan Napoleon Bonapart fransız taxt-tacından əl çəkməli olur. İmperator titulu saxlanılmaqla 1814-cü il aprelin 20-də Aralıq dənizindəki Elba adasına sürgün edilir. 1815-ci ildə sürgündən qaçaraq Parisə dönən Napoleon əldən verilmiş mövqeləri qaytarmaq istəyir. Lakin Vaterloo döyüşündəki məğlubiyyətdən sonra Müqəddəs Yelena adasına sürgün olunur.

1852-ci ildə İngiltərənin "Birkenhed" freqatı Ümid burnu yaxınlığında sualtı qayaya çırpılaraq batıb. Nəticədə gəmidə olan 630 nəfərdən 454-ü həlak olub.

1917-ci ildə Nyu-Yorkun "Viktor" studiyasında Yeni Orleansdan olan "Original Dixieland Jazz Band" qrupundan beş musiqiçi ilk dəfə olaraq caz kompozisiyasını yazıblar.

26 fevral 1925-ci ildə Türkiyədə "Tütün rejimi” ləğv edildi. Bu, nə idi? Krım müharibəsilə birlikdə süqut edən Osmanlı imperiyası borclarını verə bilməyəcəyini elan etdi. Borç və vergiləri toplamaq üçün xarici üç bank bir qrup yaratdı. “Tütün rejimi“ adı verilən bu qrup ölkədə istehsal olunan tütünü öz təyin etdiyi qiymətə almağa başladı. Kəndli öz tütününü özü belə çəkə bilmirdi. Tütündən başqa, duz və qəhvədən gələn vergiləri də bu qrup toplayırdı. “Tütün rejimi” öz bazasında silahlı qolçomaqlar yaradaraq istehsalçıya əziyyət verirdi. Bu səbəbdən 42 il davam edən bu müddət ərzində 20.000-ə yaxın insan həyatını itirdi. Qurulan gənc Türkiyə Cümhuriyyəti bu monopoliyaya son qoymaq üçün əvvəlcə 26 fevral 1925-ci il tarixində "Tütün rejimi"ni ləğv etdi, sonra 1 martdan tütün istehsalını ölkənin birbaşa nəzarətinə keçirdi.

1926-cı ilin 26 fevralı Sovet dövründə Azərbaycanın paytaxtı Bakıda I Türkoloji Qurultay keçirildi. Qurultayda 131 nəfər nümayəndə iştirak edib, 17 iclas keçirilib, türklərin, bütövlükdə Türk dünyasının dili və tarixinə, etnogenezisi və etnoqrafiyasına, ədəbiyyat və mədəniyyətinə dair 38 məruzə dinlənilib. I Türkoloji qurultayın qəbul etdiyi qərarlar sırasında ortaq əlifba, ortaq ədəbi dil, ortaq terminologiya kimi məsələlər vardı.

1935-ci ilin 26 fevral tarixində şotlandiyalı ixtiraçı Robert Vatson-Vatt ilk dəfə olaraq yaratdığı radarı nümayiş etdirib.

1954-cü ildə ABŞ-da mətn sətirlərinin fotoşəkillərini əldə etmək üçün ilk dəfə olaraq foto toplayan tipoqrafik maşını istifadə edilib.

1955-ci ildə "North Amerikan" şirkətinin amerikalı sınaq pilotu Corc Smit aviasiya tarixində ilk dəfə səsdən yüksək sürətlə katapult edib.

1992-ci il fevralın 25-dən 26-sına keçən gecə erməni silahlı birləşmələri Azərbaycan Respublikası Qarabağ Muxtar Vilayətinin Xankəndi şəhərində yerləşən Rusiyanın 366-cı motoatıcı alayının zirehli texnikası və hərbi heyətinin köməyi ilə Xocalı şəhərini işğal etdi, azərbaycanlılara qarşı kütləvi qırğın törətdi. Bu faciə Azərbaycan xalqına qarşı dəhşətli soyqırım olaraq tarixə düşdü. Dinc əhaliyə qarşı qırğınlarda 106-sı qadın, 83-ü uşaq olmaqla 613 Azərbaycan türkü öldürüldü, 487-i ağır yaralandı, 1275-i girov götürüldü, 150 nəfərsə itkin düşdü. Cənazələr üzərində aparılan ekspertizaya görə adamlar işgəncə ilə öldürülüb: gözləri oyulub, başları kəsilib və yandırılıb. İnsan Haqları Təşkialtı (Human Rights Watch) Xocalı soyqırımını “Qarabağ müharibəsində baş verən ən böyük qırğın” adlandırıb.

26 fevral 1992-ci ildə “İgidliyə görə” medalı ilə təltof olunmuş Şöhrət Həsənov şəhid olub. Şöhrət Həsənov uzun müddət müxtəlif vəzifələrdə çalışıb. Faciə zamanı ayon icra hakimiyyəti başçısının birinci müavini idi. O, 1992-ci il fevralın 25-dən 26-na keçən gecə son nəfəsinə və son gülləsinədək vuruşdu. Avtomat silahının darağında olan 30 güllənin hamısı artıq qurtarmışdı. O, insanların sağ-salamat çayı keçməsinə kömək edib, sonra isə erməni snayperinə tuş gəlib, iki ayağından vuruldu. Təəssüf ki, Şöhrət Həsənovu işgəncə verərək öldürüblər. Əvvəlcə sağ qolunu və sağ qıçını kəsiblər, sonra sağ gözünü çıxarıblar və bu cür işgəncələri davam etdirərək onu qətlə yetiriblər…

26 fevral 1992-ci ildə Azərbaycanın Milli Qəhrəmanı Araz Səlimov şəhid olub. 1 iyun 1960-cı ildə Xocalı şəhərində doğulub. 1975-ci ildə burada orta məktəbin səkkizinci sinfini bitirib. 1978-ci ildə hərbi xidmətə çağırılıb. 1980-ci ildə ordudan tərxis edilir və doğma yurdu Xocalıya qayıdır. Burada tərəvəzçilik sovxozunda işləməyə başlayır. 1988-ci illərdən başlayaraq ermənilərin millətçilik və işğalçılıq siyasəti geniş vüsət almağa başlayanda Araz könüllü olaraq Xocalı özünümüdafiə batalyonlarından birinə yazıldı. Cəsur döyüşçü dəfələrlə qaynar döyüşlərə girdi. Araz 1992-ci il 26 fevral Xocalı faciəsi zamanı son gülləsi qalana qədər vuruşdu. Vətənin cəsur oğlu onlarla dinc sakini xilas etdi. Erməni vəhşiləri onun izinə düşdülər Əsgəran rayonunda qardaşı Fəxrəddinlə Arazı vəhşicəsinə min bir əzabla qətlə yetirdilər. Xocalı faciəsi zamanı Araz Səlimovun ailəsindən üç nəfər həlak oldu: Özü, qardaşı və atası.

26 fevral 1992-ci ildə Azərbaycanın Milli Qəhrəmanı Canpolad Rzayev şəhid olub. 1968-ci il 26 fevral Ağdam rayonunun Çuxurməhlə kəndində anadan olub. O, burada Əhmədavar kənd orta məktəbini bitirib. 1988-ci ildə hərbi xidmətə çağırılan Canpolad raket qoşunlarında xidmət etdi və leytenant rütbəsi almışdı. Qarabağ müharibəsi başlayanda o, könüllü olaraq vətənə döndü. Xramort, Xanabad, Əsgəran, Qarakənd uğrunda gedən döyüşlərdə rəşadətlə vuruşurdu. 26 fevral 1992-ci il Xocalıdan gələn xəbər ona yaman təsir etmişdi. Ermənilər Xocalı şəhərində Rusiyaya məxsus 366-cı moto-atıcı alayla birlikdə dinc sakinləri vəhşicəsinə öldürür, uşaqların, körpələrin başlarını kəsir, evləri yandırırdılar. Bu xəbəri alan Canpolad tankına oturaraq Qaraqaya kəndinə üz tutdu. Burada xeyli erməni quldurunu sərrast atəşlərlə məhv edən cəsur döyüşçü yüzlərlə dinc sakinin mühasirədən çıxmasına şərait yaratdı. Hər tərəfdən atəşə məruz qalan Canpolad döyüş meydanında qəhrəmancasına həlak oldu.

26 fevral 1992-ci ildə Azərbaycanın Milli Qəhrəmanı Füzuli Rüstəmov şəhid olub. Füzuli Salah oğlu Rüstəmov 25 dekabr 1965-ci il Tərtər rayonunda anadan olub. Ata və anasını erkən itirən Füzuli Xocalıda babası Kərim kişinin himayəsində böyüyüb. Burada səkkizillik məktəbi bitirən Füzuli ağır şəraitdə yaşadığından məktəbi bitirən kimi işləməyə başlayır. Füzuli 1989-cu ildə kəndlərinə yaxın olan erməni postuna hücum edərək oranı dağıtmışdı. Bundan ötrü ona 4 ay həbs cəzası verildi. 1990-cı ildə ermənilərin Xankəndinə gedişinin qarşısını almaq üçün Xocalı aerportunu partlatmaq lazım gəldi. Dörd nəfərlik qrup yaradılanda Füzuli də bu qrupun üzvü oldu və əməliyyatı uğurla başa vurdular. Xocalı faciəsi zamanı onlarla dinc sakini xilas edən Füzuli Azərbaycanın Milli Qəhrəmanı Aqil Quliyevi də yaralı vəziyyətdə döyüş meydanından çıxarmağa müvəffəq olmuşdu. Neçə-neçə insanı xilas edən cəsur döyüşçü boynundan ağır güllə yarası aldı, onu Ağdam Mərkəzi Xəstəxanasına çatdırsalar da, artıq gec idi Füzuli xeyli qan itirmişdi.

26 fevral 1992-ci ildə Azərbaycanın Milli Qəhrəmanı Tofiq Hüseynov sonuncu qumbarasını sinəsinə sıxaraq özünü və erməniləri partlatdı. 19 aprel 1954-cü ildə Xocalı şəhərində doğulub. O, 1961–1971-ci illərdə burada məktəbdə oxuyub. 1974-cü ildə sovet ordu sıralarına çağırılmış, 1976-cı ildə ordudan tərxis olunub. Onu Xocalıda "Mixaylo" adlandırırdılar. Ermənilər Naragux kəndindən Xocalını tez-tez top atəşinə tuturdular Tofiq bu ərazini müəyyənləşdirib ermənilərin qurğularını məhv edir. Daha sonra Mehdikənd kəndində yerləşən erməni quldurlarının artilleriyası "Alazan" qurğusu partladılmış, ferma darmadağın edilmişdi. Tofiq burada on erməni yaraqlısını əsir götürmüşdü. Bu əməliyyatdan sonra ona mayor rütbəsi verildi. Mixaylonun sonuncu döyüşü Xocalıda 26 fevral oldu, o, neçə-neçə dinc sakini təhlükəsiz yerə çıxara bilmişdi. Son nəfəsinə, sonuncu gülləsinə qədər vuruşan Tofiq onlarla erməniləri məhv etdi son anda sonuncu qumbarasını sinəsinə sıxaraq özü ilə bərabər yaxınlığında olan erməni də partlatdı. O, həmin gecə doğma yurdunda gözlərini əbədi yumdu…

26 fevral görkəmli Azərbaycan şairi Əli Tudənin xatirə günüdür. Hələ 13 yaşından onun şeirləri almanaxlarda, qəzetlərdə çap olunmağa başlayıb. Cənubi Azərbaycanda Milli Hökumət qurularkən Maarif Nazirliyində Təhsil şöbəsinin müdiri işləyən Əli Tudənin ana dilində kitabların tərtib və çap edilməsində böyük rolu olub. İran tarixində ilk dəfə yaradılan filarmoniyanın - Təbriz filarmoniyasının əsasını qoyub. Milli hökumətin ən ali mükafatına – “21 Azər” medalına layiq görülüb. Bakıya köçəndən sonra da ədəbi fəaliyyətini davam etdirən Əli Tudənin 40-a yaxın kitabı nəşr olunub. (1924-1996)

2004-cü il 26 fevral tarixində Makedoniya Respublikasının Prezidenti Boris Traykovski (şəkildə) Bosniya və Herseqovina yaxınlığında aviaqəzada həlak oldu.

2017-ci ilin 26 fevralında Los Ancelesdə təşkil edilən 89-cu Oskar (Oscar) Müküfatı Mərasimində bir ilk yaşandı. “Ən yaxşı film” mükafatını qazanan “Moonlight” filminin aktyoru Maherşala Əli “Ən yaxşı ikinci dərəcəli rol aktyoru” mükafatının sahibi oldu. M.Əli Oskar qazanan ilk müsəlman aktyor olaraq tarixə düşdü.