Zaman dəyişir, texnologiya inkişaf edir, zövqlər də onunla birlikdə formalaşır. Amma bir xalqın estetik duyumu, sənət anlayışı və dəyər sistemləri bu qədərmi asan deformasiyaya uğrayar? Bu sual, günümüzdə “sənət” adı ilə təqdim edilən bayağılıqla qarşılaşdıqca daha sərt şəkildə ortaya çıxır.

Əsl sənətkarlar — illərini öyrənməyə, yetişməyə, dərin duyğuları ifadə etməyə sərf edən insanlar — bu gün səhnənin kənarına sıxışdırılıb. Onların səsi daha az eşidilir, çünki onların sözləri qışqırmır, danışır. Amma təəssüf ki, danışanı eşidən yoxdur. Ekranlarda, sosial mediada, verilişlərdə ön plana çıxarılanlar isə nə not bilir, nə sözün məsuliyyətini daşıyır, nə də cəmiyyətə təqdim etdikləri obrazın nəticələrindən xəbərdardır. Əxlaqdan, mədəniyyətdən, dəyərdən uzaq bir nümayişdir bu — adına “şou-biznes” deyilir, amma içində nə şou var, nə də biznes; yalnız bir tamaşa, ucuz və bəsit.

Xalqın zövqünə güvənmək istərdik, amma bu gün əksər hallarda xalq, sənətin deyil, görüntünün arxasınca gedir. Qışqıran, soyunan, reytinq xətrinə hər sərhədi aşan bir kütlə — və o kütlənin ayaqda alqışladığı şəxslər. Sanki mikrofona sahib olan hər kəs müğənnidir, səhnəyə çıxan hər kəs sənətkardır. Amma bilirik: səs səsə bənzər, sənətkarlıq isə qürura, duruşa, zəhmətə ehtiyac duyar.

Bu gün dəstək verilənlər, sabah unudulacaq. Amma sənət tarixlə yaşayır. O tarixin səhifələrində kimlərin qalacağına qərar verəcək olan da xalqın özü deyil, zamanın ədalətidir. İndiki dövrdə susan əsl sənətkarlar, sabah danışacaq. Onlar səhnədən deyil, içimizdən keçəcək.

Və biz o zaman utanacağıq — sənəti deyil, sirk tamaşasını alqışladığımız üçün.

Fərid Əmiraslanov
"AYMEDİACOMPANY.AZ" Mədəniyyət işləri üzrə direktor müavini