Sosial şəbəkələrin birində “Babəl həvaic xeyriyyə qrupu” adında bir səhifə qarşıma çıxdı. İstər-istəməz diqqətimi çəkdi və səhifəyə daxil oldum, buradakı paylaşımlardan başa düşdüm ki, bu xeyriyyəçilik məqsədi ilə Azərbaycanın bölgələrini gəzib ehtiyacı olan insanlara yardım əlini uzadan bir xanımdır. Səhifədə heç bir video paylaşımda nə üzü görsənmir, nə adı hallanmır. Diqqətimi çəkdi və bu xeyirxah xanımla sosial şəbəkə üzərindən əlaqə yaratdım. Məlum oldu ki, bu xanımın adı Fəridədir.
Müqəddəs Qurani-Kərimin Bəqərə surəsi, 177-ci ayəsində yazılır ki:
"Yaxşılıq yalnız üzlərinizi (ibadət üçün) şərq və qərbə tərəf çevirmək deyildir. Lakin həqiqi yaxşılıq Allaha, axirət gününə, mələklərə, (səmavi) kitablara və peyğəmbərlərə iman gətirən, eləcə də, öz malını çox sevməsinə (və ona ehtiyacı olmasına) baxmayaraq Allah eşqinə qohumlarına, yetimlərə, yoxsullara, yolda qalanlara, dilənçilərə və qulların azad olunmasına verən, namaz qılan, zəkat verən, əhd-peyman bağlayan zaman öz əhdinə vəfalı olanlar, (məxsusən,) maddi çətinlikdə, cismani zərərlərdə və cihad zamanı səbirli olan kəs(in iman və əməli)dir. Onlardır doğru danışanlar və onlardır təqvalılar! (Ümumiyyətlə, yaxşılıq üç cəhətdən-etiqad, əməl və əxlaqdan ibarətdir.)"
Müsahibim Mingəçevir şəhərində yaşayan Fəridə xanım da etiqad, əməl və əxlaqi keyfiyyətlərini özündə ehtiva edərək xeyriyyəçiliyi özünün bir yaşam tərzi və müqqədəs amalı bilən, bu yolda xidmət edən dəyərli bir Azərbaycan xanımıdır.[/justify]

-Fəridə xanım, xoş gördük sizi. Özünüzü oxucularımıza təqdim edərdiniz.
-Xoş gördük, Fərid müəllim. Açığı həyatımda birinci dəfədir ki, müsahibə verirəm, onun üçün biraz çəkinirəm, (gülür), ancaq hər şey yaxşıdır. Mən Şəkiyeva Fəridə Nazim qızı 1994-cu ildə Neftçala rayonunun Xəzər kəndində anadan olmuşam.
-Sizi Mingəçevirdə yaşayan bilirdim.
-Bəli, Mingeçevirə gəlin gəldiyim üçün burada yaşayıram.
-Sizi fərqli rayonlarda, insanların xidmətində görürük. Bu, övladlarınızın sizsiz daha çox olmaqlarına və ailənizdə narazılığa səbəb olmur?
-Xeyir, olmur. Ona görə ki, övladlarım baxçaya gedir və mən yaxın rayonlara getdiyim üçün övladlarım baxçadan çıxana qədər artıq mən yardımları verib geri qayıdıram.
-Fəridə xanım, xeyriyyə işiylə məşğul olmağa sizi nə vadar edir?
-Bu mənim daxili aləmimin, ruhumun ehtiyacıdır, həmçinin inanclarımdan dolayı düşünürəm ki, insanlara yardım etmək, onların hər hansı bir problemini həll etmək ALLAH qarşısında da hər bir müsəlmanın borcudur.
-Xeyriyyə işlərinə ilk haradan və necə başlamısınız?
-Bizim özümüz də ehtiyac və sosial problemli ailə olmuşuq. Mənim özümə də xeyirxah insanlar yardım edib. Kimisi ərzaq, kimisi uşaqlarıma geyim, kimisi maddi dəstək formasında. Bu işlərlə məşğul olan regionlarımızda kifayət qədər insanlar var və elə mən özüm də o insanların bu xoş əməllərindən ilhamlanıb qərara gəldim ki, xeyriyyə işləri ilə məşğul olum. Çünki ehtiyacın nə olduğunu bilən adam, kasıblığı görən adam ehtiyaclı insanları daha yaxşı başa düşür. Ona görə də qərara gəldim və ilk addım olaraq ətrafımdaki ehtiyyaclı insanları öz whatsapp hesabımda paylaşmağa başladım. Gördüm ki, insanlar, təbii ki, məni tanıyanlar paylaşdığım insanların telefon nömrəsini istəyib o insanlara yardım edirlər. Daha sonra sosial şəbəkələrdə hesab yaratdım və xeyirxah insanlar tərəfindən dəstək alaraq bu işə başladım.
-Yardımlarınız əsasən nələrdən ibarətdir?
-Bəzən ehtiyaclı ailələrə ərzaq, pul yardımı, xəstələrə dərman, bəzən də əksik ev əşyası almışıq. Hətta elə ailələr olub ki, həyətlərinə su artezianı quraşdırmışıq, o cümlədən bir çox kasıb ailələrin evini təmir etdirmişik.Yəni yardımlarımız fərqli olub.


-Bir xanımın belə yardım kampaniyası başladaraq insanlara kömək etməsi təşkilati iş tələb edir və bu işdə sizlərə kömək edən insanlar olmamış olmaz.
-Əlbəttə, biz xeyirxah insanlar vasitəsilə bu işləri görürük. Xeyriyyə işləri ilə məşğul olan xanımlar və onların ətrafındakı insanlar bizə bu işdə çox yardım göstərib. Əsasən xanımlardan ibarət yardım qruplarından mənə dəstək göstəriblər.
-İlk yardım etdiyiniz insan yadınızdadırmı?
-Bəli, yadımdadır. Şəmkir rayonunun Yeniabad kəndindən bir ailə səhifəmizə mürüciət etmişdi. Ailə başçısının səhhətində ciddi problemlər olduğu üçün işləyə bilmirdi. Həm də əsgər atası idi. Bu ailənin görüşünə getdim, şəraitləri ilə tanış oldum. Ərzaq yardımı aparmışdım. Gedəndə şahid oldum ki, ailənin bir övladı hərbi xidmətdədir. Biz gedəndə soyuq fəsil idi. Ailənin yaşadıqları evin içinə yağış suyu tökülürdü. Bu məni çox sarsıtdı. Mingəçevirə döndüyümdə o gecəni səhərə qədər gözümə yuxu getmədi. Sübh tezdən paylaşımlar etdim və xeyirxah insanlarla əlaqə yaradaraq bu ailə üçün yardım topladım və bir neçə gündən sonra Şəmkirə qayıtdım və evlərinin tavanını təmir etdirdik.
-Fəridə xanım, məmləkətimizdə dırnaqarası xeyriyyə işləriylə məşğul olan, yəni insanların mərhəmət hisslərindən istifadə edən dələduzlar da var. Özünüzü belə şeylərdən sığortalamaq üçün nə edirsiniz?
-Bizim yardım kartımıza gələn bütün maddi vəsaitləri mən şəxsən hamısını 1 manat da olsa hesablarımda paylaşıram. İnsanlar bizə yardım
məqsədi ilə göndərdikləri vəsaiti də, sərf elədiyimiz yerləri də şəffaflıq üçün sosial platformalarımızdakı hesablarımızdan paylaşıram. Çünki 1 manat da olsa göndərilən pul mənim yox, xalqın puludur və mən özümə borc bilirəm ki, insanlara bunu paylaşmaqla hesabat verim. Fikrimcə, bu işlərə qazanc yeri kimi baxan və məşğul olan insanların mənəviyyatı yoxdur.
-Gələcəkdə xeyriyyə işlərini genişləndirmək haqqında düşünürsünüz?
-Uca ALLAHdan hər zaman millətimiz, dövlətimiz üçün dualar edirəm. Əlbəttə, planlarım var. Hər bir məmləkətdə ehtiyaclı insanlar yaşayır. Bu normal haldır. İnşallah günü gündən elə rifah olsun ki, bizim kimi inancı gərəyi xırda yardım işləri görən insanların yardımına da heç kimin ehtiyacı olmasın. Bu inkişaf gözümüzün qabağındadır və görürük. Ancaq düşünürəm ki, nə qədər canımda can var xeyriyyə işlərimi davam edəcəm.
-Sizin kimi dəyərli, xeyriyyəçi bir Azərbaycan xanımını tanıdığım üçün həqiqətən də çox şadam. Sizə bu müqəddəs və çətin yolda uğurlar arzu edirəm və düşünürəm ki, ucalmaq və xeyirxahlığı ən gözəl şəkildə təbliğ etmək sizin kimi insanlara yaraşır.
-Təşəkkür edirəm. İşıqlandırdığınız üçün ALLAH sizdən razı olsun. Həmişə yola davam. Sağ olun.
Fərid Əmiraslanov
“AYMEDİACOMPANY.AZ” mədəniyyət işləri üzrə direktor müavini

[/center]