“Ermənistanın Azərbaycandan qaz almaqla bağlı təklifinə baxıla bilər. Müharibə qələbəmizlə başa çatıb və məğlub tərəf qalibdən qaz istəyir, lakin məsələnin mürəkkəb yönləri var”.

Bu sözləri Globalinfo.az-a sabiq maliyyə naziri, iqtisadçı alim Fikrət Yusifov deyib.

Onun sözlərinə görə, Ermənistanın bu istəyinə qarşı getsək, onlar bizi münasibətlərin yaxşılaşdırılması istiqamətində atdıqları addımı rədd etməklə şantaj edəcəklər:

“Ermənistan Konstitusiyasında və digər hüquqi aktlarında Azərbaycan torpaqlarına qarşı iddiaların qaldığı bir şəraitdə iki ölkə arasında hansı iqtisadi əməkdaşlıqdan söhbət gedə bilər?! Ermənistan kimi siyasi cığal olan bir ölkəyə güvənmək olarmı? İrəvanın vədlərinə inanıb qaz satmağa başlasaq və bir müddətdən sonra həmişə olduğu kimi, üzərinə götürdüyü öhdəlikləri yerinə yetirməsə, nə baş verəcək? Təbii ki, məcbur olub Ermənistana verilən qazın kranını bağlamalı olacağıq. Belə olan halda Ermənistan bizi beynəlxalq aləmdə şantaj edəcək, qazın ötürülməsini dayandırdığımıza görə onu dəstəkləyən Qərbi üzərimizə qaldıracaq. Qərb isə həmişə olduğu kimi, Azərbaycanın deyil, Ermənistanın səsini eşidəcək”.

Sabiq nazir qeyd edib ki, İrəvan Azərbaycandan qaz almaq üçün ərazilərimizə təhdid dolu hüquqi aktlarında dəyişiklik etməlidir:

“Bundan sonra iki ölkə arasında sülh müqaviləsi imzalanmalı və bütün səviyyələrdə iqtisadi əlaqələrin qurulmasına start verilməlidir”.

Bunu da oxuya bilərsiniz: Qətərdəki səfirimiz haqda sensasiya: Mahir Əliyevin inanılmaz əməlləri – VİDEO

Turan Rzayev
Globalinfo.az