Prezident İlham Əliyev VII çağırış Milli Məclisin ilk iclasındakı çıxışında və “ADEX-2024”, eləcə də “Securex Caspian” 14-cü Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisinin iştirakçılarına müraciətində diqqətçəkən fikirlər səsləndirib.

Globalinfo.az-a danışan politoloq İlyas Hüseynov deyib ki, Prezidentin regional təhlükəsizlik, sülh prosesi, müdafiə və təhlükəsizlik məsələləri ilə bağlı dedikləri mühüm mesajları özündə ehtiva edir:

“Ölkə başçısı sərhədin gücləndirilməsindən, hərbi xərclərin artırılmasından xüsusilə bəhs etdi. Bu, mühüm məsələdir. Sərhədlərimizin etibarlı mühafizəsi ordunun qarşısında dayanan əsas missiyadır. Ötən ilin sentyabr ayında keçirilən lokal xarakterli antiterror əməliyyatlarından sonra ölkəmizin suverenliyi tam təmin olundu. Bu reallığı gözü götürməyən, həzm etməyən qüvvələr var. Onlar hər vəchlə prosesləri dəyişməyə çalışır.

Bu gün həmin qüvvələr Ermənistanı silahlandırır, regionda gərginliyi artırır. İşin qəribə tərəfi Rusiya-Ukrayna müharibəsinə dəstək verən, habelə Rusiyanın sanksiya çəmbərini yarmasına kömək edəcək ölkələr sanksiya tətbiq ediləcəyi deyildiyi halda Qərb Ermənistanı cəzalandırmır.

Rəsmi İrəvan bu gün Rusiyaya açıq şəkildə sanksiyaları yarmaqda kömək edir. Bunu Qərb də bilir, amma təzyiq edilmir. Bu həm təəccüb doğuran, həm də riyakar yanaşmadır.

Ermənistanın silahlanması Azərbaycanın da hərbi xərclərinə müdafiə potensalını artırmasına gətirib çıxarır. Bakı öz təhlükəsizliyini hər zaman qorumalıdır. Bu baxımdan ölkə başçısının dedikləri yerində və düzgün idi”.

Turan Rzayev
Globalinfo.az