Azərbaycan Prezidenti İlham Əliyev MDB Dövlət Başçıları Şurasının iclasında iştirak etmək üçün oktyabrın 7-də Rusiya Federasiyasına səfər edib.

İndiki geopolitik gərginlik fonunda MDB liderlərinin Moskvada toplanması dünya siyasətinə başqa çalar verir? Bu formatlardakı görüşlərdə hansısa kritik qərarlar qəbul edilə, razılaşmalar əldə edilə bilərmi?

Globalinfo.az-a danışan beynəlxalq münasibətlər üzrə ekspert Əziz Əlibəyli deyib ki, son zamanlar Qərblə Azərbaycan arasında yaşanan qarşıdurmada Rusiya faktoru önəmli nöqtədədir:

“Hesab edirəm, Rusiyanın mövqeyi sülh müqaviləsi ilə bağlıdır. Kreml Azərbaycandan, bir növ, xahiş edir ki, sülh müqaviləsi regionun spesifik təhlükəsizliyini nəzərə alaraq imzalansın.

Bu gün Qərbin Azərbaycana təzyiq göstərdiyi məlumdur. Qərb bunu Rusiyaya təzyiq adı altında edir. Xüsusilə təzyiqlər, təhdidlər ölkəmiz üçün regionlaşır. Şübhəsiz, Kreml çalışacaq ki, Moskvada Azərbaycan-Ermənistan liderlərini bir araya gətirsin. Bu baş versə, Putin Qərbə qarşı ciddi bir revanş əldə etmiş olar”.

Politoloq xatırladıb ki, Azərbaycan Prezidenti uzun müddətdir Qərb formatında sülh danışıqlarında iştirak etmir:

“Prezident BMT-nin son Assambleyasında da çıxış etmədi. Əslində, bunlar Qərbin təzyiqlərinə Bakının etirazıdır. Qərb “erməni kartı”ndan istifadə edərək təzyiqləri leqallaşdırmağa çalışır.

Bütün bunları nəzərə alsaq deyə bilərik ki, Prezident İlham Əliyevin MDB Dövlət Başçıları Şurasının iclasında iştirak etməsi həm də Qərbə mesajdır”.

Turan Rzayev
Globalinfo.az