2010-cu il iyunun 19-dan Azərbaycanda hamı - qocalar, cavanlar, uşaqlar - Mübariz İbrahimovun misilsiz qəhrəmanlığı, igidliyi haqqında danışmağa başlamışdı. O, öz qəhrəmanlığı ilə göstərdi ki, canını Vətən torpaqlarının yolunda hər an qurban verməyə hazır olan igidlərimiz hələ çoxdur. Mübariz öz həyatını qurban verməklə Azərbaycana bir örnək göstərdi.
Qəhrəmanlıq - geri dönməyəcəyini bilə bilə irəli atılmaqdır! Sən o böyük ürəyinə BÜTÖV AZƏRBAYCAN'ı sığdırıb getdin!
Mübariz İbrahimovun valideynlərinə yazdığı son məktubunun əlyazması çoxaldılaraq gənclər arasında sürətlə yayıldıqdan sonra heç şübhəsiz onun kimi olmaq istəyənlərin sırası genişləndi.
“Canım, atam və anam. Məndən sarı darıxmayın. İnşallah, cənnətdə görüşəcəyik. Mənim üçün bol-bol dua edin. Vətənin dar günündə artıq ürəyim dözmür. Allaha xatir bunu etməliyəm. Ən azından ürəyim sərinlik tapar. Şəhid olanadək bu şərəfsizlərin üzərinə gedəcəyəm. Şəhid olsam – ağlamayın. Əksinə, sevinin ki, o mərtəbəyə yüksəldim. Allaha ibadətlərinizi dəqiq yerinə yetirin. Çoxlu sədəqə verin. Seyid nəvəsi olaraq bunu etməliyəm. Allah böyükdür. Vətən sağ olsun. Oğlunuz Mübariz.. Haqqınızı halal edin”.
18.06.2010
"Sevinin ki, o mərtəbəyə yüksəldim."
Yüksəldin,
Allah, Vətən, Millət sevgisini hər şeydən üstün tutaraq, adının haqqını verən Mübariz. İmanına heyran olmamaq əldə deyil... Rabbimin sevimli bəndəsi!
İnşəAllah, məqamın uca olsun!
Azərbaycan xalqının böyük Qarabağ dərdi var, müharibə apardığımızdan, cəmiyyətimizdə vətənpərvərlik təbliğatının bir an belə dayandırılmaması çox vacibdir.
Bunun üçün isə təlim-tərbiyə, təhsil müəssisələrində, mətbuatda, dərsliklərdə, cəmiyyət arasında hərbi vətənpərvərlik tərbiyəsinin təbliği, ordu, şəhidlər, Milli Qəhrəmanlar, düşmənə nifrətlə bağlı müxtəlif yönümlü söhbətlər aparılmalı, yazılar yazılmalı, verilişlər göstərilməli, reklamlar yayımlanmalıdır.
Vətənpərvərlik elə bir emosional hissdir ki, bütün şəxsi maraqlarını vətən yolunda qurban verməyə, vətəninin və xalqının marağını daha uca tutmağa hazır olmalısan.
Bəzən deyirlər ki, vətənpərvərlik hissi uşağa ilk növbədə atadan, anadan gəlməlidir. Razılaşmamaq olmur. Məhz ailə uşağı elə tərbiyə eləyə bilər ki, o vətənə sevgi, düşmənə isə nifrət hissləri ilə böyüsün...
Mübarizin ailəsi onu belə böyütmüşdü, mərd, vətənpərvər...
Torpaqları işğal altında olan Azərbaycan ailəsində ata da, ana da, övlad da vətənpərvər olmalıdır. Mübarizin ata-anası kimi...
Şəhid gizir Mübariz İbrahimov 2006-cı ildə Biləsuvar rayon Hərbi Komissarlığından hərbi xidmətə çağırılıb. Daxili qoşun hissələrində xidmətini başa vurduqdan sonra o, gizir kimi orduda hərbi xidmətini davam etdirirdi. Mübariz 2010-cu il iyunun 19-da cəbhənin Tərtər rayonunun Çaylı kəndi istiqamətində təkbaşına Ermənistan silahlı qüvvələrinin səngərinə daxil olaraq düşmənin sinəsinə dağ çəkib, xeyli erməni hərbçisini məhv edib, qəhrəmanlıqla şəhid olub.
Rəsmi məlumatlara görə, Mübariz İbrahimov qeyri-bərabər döyüşdə 5 düşməni məhv edərək, 3-nü yaralayaraq şəhid olub. Amma bu rəsmi məlumatdır... Düşmənin itkisi bundan çox olub, bunu ermənilər qeyri-rəsmi olaraq etiraf ediblər...
Mübariz yaxşı bilirdi ki, o döyüşdən sağ-salamat çıxa bilməyəcək. Ancaq Vətən, torpaq sevgisi, onda olan vətənpərvərlik ruhu onu şəhidlik zirvəsinə ucaltdı. Mübariz bütün gənclər üçün örnək, nümunə oldu.
M.İbrahimova şəhadətindən sonra Prezident tərəfindən Azərbaycanın Milli Qəhrəmanı adı verilib.
İyunun 18-də Azərbaycanın Milli Qəhrəmanı Mübariz İbrahimovun torpaqlarımızın müdafiəsi uğrunda canından keçərək şəhidlik zirvəsinə yüksəlməsinin ildönümünə həsr olunmuş anım mərasimləri keçirilib, xatirəsi yad edilib.
Bir xalqın adına dastan yazan, bütün dünyanı qəhrəmanlığı ilə təəccübləndirən bir İgid - MÜBARİZ İBRAHİMOV! Cənnətə getdiyin bu gündür. Sonsuz gözəl həyatı qazandın və sənin kimi minlərlə qardaşını özünlə qonşu etdin. Ruhun qarşısında baş əyirik.
"AY MEDİA COMPANY"
