Avqustun 28-də Kürdəmirin Dəyirmanlı kəndində Xüsusi Təyinatlı Qüvvələrin giziri, ŞƏHİD Nəzər Ağacəlil oğlu Əzizovun mövludu münasibətiylə mərasim keçirildi. Kürdəmirin Şəhidlər Xiyabanında igidimizin məzarına gül dəstələri, əklillər qoyularaq dualar oxundu. Rəhmətlə anılan Nəzərin mövludu tədbirində onun döyüş yoldaşları, Şəhid ailələri, kənd sakinləri, Kürdəmir İcra Hakimiyyətinin nümayəndələri, "XTQ-nin Qaziləri, Şəhid Ailələri" İctimai Birliyinin Abşeron şöbəsi kollektivi iştirak etdilər.

Tədbirdən sonra Şəhidimizin ata ocağında adına ehsan süfrəsi verildi.

Xatırladaq ki, 2016-cı ilin Aprel Döyüşlərində, 44 günlük Vətən Müharibəsində mənfur yağıya qəhrəmancasına sinə gərən Nəzər Əzizov 2022-ci ilin sentyabrın 12-dən 13-nə keçən gecə Ordumuzun "Qisas Əməliyyatı" zamanı son damla qanına qədər döyüşərək şəhidlik zirvəsinə ucaldı.

Uca Tanrı o Dünyasını Mübarək etsin!

Rüstəm Rüstəmov
"AYMEDİACOMPANY.AZ"