Hərb tariximizin şərəfli səhifəsi olan və bizi qələbə zirvəsinə ucaldan 44 günlük Vətən müharibəsində xalqımızın qeyrətli və vətənpərvər oğulları erməni işğalçılarını məğlub etdilər, torpaqlarımızın düşmən tapdağında qalmasına son qoydular, uzun illər qədəmimizin dəymədiyi, nəfəsimizin toxunmadığı, həsrətini çəkdiyimiz yurdlarımızda üçrəngli bayrağımızı qaldırdılar. Belə qəhrəman oğullardan biri də
Şəhid mayor Anar Elşad oğlu Məmmədovdur.
Bu gün Azərbaycanın igid oğullarından biri, vətən fədaisi Mayor Anar Elşad oğlu Məmmədovun doğum günüdür. Onun ömür yolu qısa olsa da, göstərdiyi şücaət və xidmət hər bir azərbaycanlı üçün örnəkdir.
Azərbaycan Respublikası Müdafiə Nazirliyinin nəzdində yerləşən Həzi Aslanov adına "Ordu İdeoloji və Mədəniyyət Mərkəzi" Zabitlər Evində "Şəhidlər ölməz, Vətən bölünməz" adlı silsilə tədbirlər keçirilir. Belə tədbirlərdən biri də Nəzirə Məmmədovanın təşkilatçılığı ilə ömür-gün yoldaşı, Şəhid Anar Məmmədov Elşad oğlunun mövludu keçirildi.
Tədbirdə Şəhidimizin ailə üzvləri, Şəhid ailələri, H.Aslanov adına "Ordu İdeoloji və Mədəniyyət Mərkəzi"nin əməkdaşları, Şəhidimizin döyüş yoldaşları, Qazilər, şair Rüstəm Behrudi, Filologiya üzrə fəlsəfə doktoru, "Hədəf" liseyinin direktoru Şamil Sadiq, kursant yoldaşı Qafil Qaflanov, Mədəniyyət və elm xadimi Nadiraz Məmmədov və digər fəxri qonaqlar iştirak edirdilər.
Tədbir Şəhidlərimizin əziz xatirəsinin bir dəqiqəlik sükutla yad edilməsi ilə başlanıb.
Tədbirdə şəhidin qəhrəmanlığından söhbət açılıb, ailə üzvləri onunla bağlı xatirələrini bölüşüblər.
Şəhid xanımı deyir ki, "Anar qəhrəman kimi yaşadı, qəhrəman kimi də əbədiləşdi":
-Anar vətənini ürəkdən sevirdi. Ön cəbhədə, səngərlərdə xidmət etmişdi. Müharibə zamanı təxminən bir ay ondan xəbər ala bilmədik. Hər kəs deyirdi ki, "Anar ön cəbhədədir, döyüşür..." Qəribəsi budur ki, Anar əsir düşməmək üçün özü özünü vurub... Bu cəsarət, bu iradə yalnız torpaq, Vətən sevgisi ilə izah oluna bilər. Peşəsinin ustası, işinin məsuliyyətli zabiti idi. Döyüş yoldaşları deyirdi: Nə qədər dedik, çox irəli getmə... O isə qətiyyətlə cavab verirdi: “Geri qayıtmaq olmaz!”
Anar mənim Vətənim idi, mən Vətənimi itirdim.
Şəhidin kursant yoldaşı Qafil Qasımov onun haqqında danışarkən gündəlikdə yazılan xatirələrdən söz açdı. O xatirələrdən biri isə xüsusilə yadda qalır:
“Vətən kimdir?” sualına Anar Məmmədov “Anamın anası” cavabını vermişdi.
Bu sadə, amma dərin cavab onun Vətənə necə ürəkdən bağlı olduğunu göstərir.
Qısa arayış:
Anar Məmmədov 1986-cı il mayın 2-də Sabirabad şəhərində anadan olub. Ailəli idi. İki övladı yadigar qalıb.
Azərbaycan Ordusunun mayoru olan Anar Məmmədov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Xocavəndin azadlığı uğrunda gedən döyüşlərdə savaşıb. Döyüşlər zamanı yaralansa da, bir gün hospitalda müalicə aldığdan sonra döyüş meydanına geri dönüb. Anar Məmmədov oktyabrın 20-də Xocavənd döyüşləri zamanı 26 əsgərini mühasirədən çıxarıb, sona qədər döyüşüb, sonda bir gülləsi qalanda isə onu özünə vuraraq şəhid olub. Sabirabad rayonunun Cavad kəndində dəfn olunub.
Əbədiyyətə Qovuşan İgid: Mayor Anar Məmmədov
Bəzi insanlar dünyaya gələndə sanki üzərlərinə böyük bir missiya götürürlər. Anar Məmmədov da məhz belə şəxsiyyətlərdən idi. O, peşəkar bir zabit kimi ömrünü ordumuza, vətənimizin təhlükəsizliyinə həsr etdi. Bu gün onun fiziki yoxluğunda qeyd etdiyimiz doğum günü, əslində bir qəhrəmanın ölməzliyinin bayramıdır.
Mayor Anar Məmmədov xidmət etdiyi illər ərzində hər zaman nizam-intizamı, cəsarəti və tabeçiliyində olan əsgərlərə qarşı qayğıkeş münasibəti ilə seçilib. O, hərbi andına sadiq qalaraq, torpaqlarımızın azadlığı və suverenliyi uğrunda hər an canından keçməyə hazır olan bir komandir idi.
Bir mayor rütbəsinə qədər yüksəlmək təkcə hərbi bilik deyil, həm də sarsılmaz iradə tələb edir. Anar Məmmədov bu iradənin təcəssümü idi.
Onun üçün Vətən sadəcə xəritədə bir ərazi deyil, qorunmalı olan ən ali müqəddəs əmanət idi.
Şəhidlik zirvəsinə ucalmaq hər kəsə nəsib olmayan bir şərəfdir. Anar Məmmədov öz canı ilə bizə azad nəfəs almaq, torpaqlarımıza sahib çıxmaq haqqını qazandırdı. Bu gün onun doğulduğu evdə kədər deyil, qürur hakimdir. Çünki o, adını Azərbaycan hərb tarixinə qızıl hərflərlə yazdırdı.
"Şəhidlər vurulanda yox, unudulanda ölürlər." Biz Mayor Anar Məmmədovu heç vaxt unutmayacağıq. Onun ruhu hər zaman Azərbaycan səmalarında, dalğalanan üçrəngli bayrağımızda yaşayacaqdır.
Doğum Günün Mübarək, Cənab Mayor!
Sənin qanınla suvarılan torpaqlar indi azaddır. Sənin qoyub getdiyin miras - şərəfli bir ad və azad Vətəndir. Ruhun qarşısında baş əyirik!
Məkanın cənnət, uca məqamın mübarək olsun!
Almaz Yaşar
"AYMEDİACOMPANY.AZ"
