“İsmayıllı Yazarları” ədəbi-ictimai birliyi və “Dağ çiçəkləri” ədəbi məclisi üzvlərinin seçilmiş yaradıcılıq nümunələrinin toplandığı “Bir dəstə çiçək” almanaxı işıq üzü görüb.

Bu nəşr sözün sehri ilə yoğrulmuş duyğuların, dağ nəfəsli ilhamın və qəlb incəliklərinin bir araya gəldiyi zəngin mənəvi xəzinədir. Almanaxda yer alan şeir və nəsr nümunələri müəlliflərin daxili aləmini, Vətən sevgisini, insan duyğularını və həyatın müxtəlif çalarlarını özündə əks etdirir.

Böyük məmnunluq və qürur hissi ilə bildiririk ki, yaxın günlərdə oxuculara təqdim olunacaq bu almanax hər bir kəlməsi ilə sevgi, vətənpərvərlik və mənəvi dəyərləri tərənnüm edəcək, zəngin məzmunu ilə oxucuların rəğbətini qazanacaq.

Topluda 33 qələm sahibinin ürək çırpıntıları, yaradıcılıq axtarışları və ədəbi dünyasının bir parçası yer alıb. Nəfis tərtibatla ərsəyə gətirilən almanaxın tərtibçi-redaktoru şair-publisist, Prezident mükafatçısı Şahməmməd Dağlaroğludur.

Bu münasibətlə almanaxda təmsil olunan bütün müəllifləri ürəkdən təbrik edir, onlara yeni yaradıcılıq uğurları, söz dünyalarında daha böyük nailiyyətlər arzulayırıq.

İnanırıq ki, “Bir dəstə çiçək” almanaxının hər səhifəsi oxucu qəlbində bir duyğu toxumu səpəcək, hər misrası isə ruhu oxşayan bir nəğmə kimi yaddaşlarda yaşayacaq.