İllər öncə gülüşü ilə aləmi nura qərq edən, Koroğlunu xatırladan bir igid var idi bu dünyada. Söhbət tay-tuşlarının sevimlisi, qohumların, yaxınların göz bəbəyi, anası Əzizə xanımın, atası Şahin kişinin tək oğul balası, payız günlərində xəzan vurmuş çiçəklərtək solan Şahlar Məmmədovdan gedir.
Şahlar Məmmədov 1 noyabr 1995-ci ildə Neftçala rayonu Ərəbqardaşbəyli kəndində anadan olmuşdur. Ali məktəbə qəbul üçün imtahan versə də qəbul ola bilməyən Şahlar, təhsil həyatında uğursuzluqla qarşılaşır və müddətli həqiqi hərbi xidmətə yollanır...

Ailənin kiçik övladı olan Şahların özündən 2 yaş böyük Əfsanə adlı bir bacısı var. O, bacısı ilə söhbət edən zaman Əfsanə ona "Şahlar, təhsil ala bilməsən də elə bir peşəyə yiyələn ki, kəndə gələndə ana-atamız səninlə fəxr etsin" deyir. Bu sözə qarşılıq olaraq Şahlar: "Söz verirəm, bir gün hər kəs qarşımda baş əyəcək" sözün verir. Əfsuslar olun ki, sözündə də durur. Bəli, bu gün Şahlar Məmmədovla yanaşı 3000 Şəhidimizin ruhu qarşısında Azərbaycan xalqı baş əyir. Mehribanlığı, gülərüzlülüyü, səmimiliyi, utancağlığı ilə seçilən igid qardaşımızın yaddaşlara həkk olan bir çox sözləri var. Eləcə də bu söz - "Kimlərə qaldı dünya? Şahlara qaldı dünya"...

Bu fani, günahlarla dolu, dünyada hər kəs əbədi dünyası üçün çalışır. Kimisi cənnəti üçün çiçək toplayır, kimisi də cəhənnəmi üçün odun. Fərəh hissi ilə qeyd edirəm ki, Şahlar kimi igid, qəhrəman qardaşlarımız bu dünyada topladığı al-əlvan güllər ilə bizim təxmin edə bilməyəcəyimiz, sözlə ifadə edə bilməyəcəyimiz qədər gözəl gül baxçaları saldılar.

44 günlük Vətən Müharibəsinin 43 günü vəzifəsini layiqincə yerinə yetirən Şahlar Şahin oğlu Məmmədovun ailəsi onun müharibədə iştirak etməsindən bixəbər olub. Bir ana xəyal edin - Qələbə xəbərin eşitcək xalq arasına qarışıb tanıdığı, tanımadığı hamıya gözaydınlığı verir... Sevincinin həddi- hüdudu yoxdur. Lakin... Lakin gözünün ağı-qarası, soyunun tək davamçısı, tək oğul balasının Şəhid xəbəri gəlir. Dünya gözündə qaralır. Hər kəsə gözaydınlığı verən anaya başsağlığı verməyə başlayırlar...

Daxili Qoşunlarda fəaliyyət göstərən Şahlar Füzuli, Cəbrayıl, Qubadlı, Zəngilan və Qarabağın dilbər guşələrindən olan Şuşada layiqincə vəzifəsini yerinə yetirir. Və 7 Noyabr 2020-ci il tarixində, 25 yaşında şəhadətə yüksəlir. 10 Noyabr 2020 -ci il tarixində isə ata-baba yurdu olan Neftçala rayonu Ərəbqardaşbəyli kəndində "Vətən sağ olsun", "Şəhidlər ölməz, Vətən bölünməz!" şüarları ilə son mənzilə yola salınır. Qan, can bahasına yazılmış o şanlı tarixdən - 10.11.2020-ci ildən artıq 3 il keçir. 3 il əvvəl, Şahların üçrəngli şanlı bayrağa bükülmüz nə'şi gələn zaman həyəti el deyimi ilə, "Xara"larla bəzədildi və hələ də bar verən ağaclarda al-əlvan xaralar durur, sanki o gündən sonra Məmmədovlar ailəsi üçün zaman durdu, yaşam bitdi...

10.11.2023-cü ildə Şahlar Şahin oğlu Məmmədovun şəhadətinin 3-cü il dönümü qeyd edildi. Şəhidimizin böyüyüb boya başa çatdığı evdə ehsan süfrəsi açıldı. Yas mərasimində "AYMEDİACOMPANY.az" xəbər saytının bölgə muxbiri, Şəhid ailələri, Neftçala RİH-in nümayəndələri, Din xadimləri, Şahlar Məmmədovun döyüş yoldaşları, Qazilər, "Gündoğar" qəzetinin redaktoru və vətənsevərlər iştirak ediblər.
Allahdan Şəhidimizə rəhmət, qazilərimzə can sağlığı diləyirəm.
Şəhidlərimizin məkanı behişt, məqamı uca olsun!


SEVİNC SALEHQIZI
"AYMEDİACOMPANY.AZ" bölgə müxbiri