Qədim türklərdə hər il dekabr ayının 21- i gecəsi, gecə ilə gündüzün bərabərləşməsi münasibəti ilə Narduğan bayramı keçirilərdi. Həmin gecə hər kəs bir şam ağacı kəsib evinə aparar, budaqlarından rəngli parçalar asaraq bəzəyər, altına hədiyyələr düzərdilər.

Axşamdan böyükləri ziyarət edər, onların bayramlarını təbrik edər, uşaqlara hədiyyələr verərdilər.

Gecəni isə obanın mərkəzində bəzədilmiş şam ağacının ətrafına toplaşar, kımız içər, qopuz çalıb, əl - ələ verərək şam ağacının ətrafında yallı gedərdilər. Şam ağacı quruluşuna görə müqəddəs ağac hesab olunardı. Ağacın səmaya doğru millənməsinə görə ona yolka deyərmişlər. Yolka qədim türk dilində səmaya uzanan yol, Tanrıya gedən yol deməkdir ki, ruslara da bu söz qədim türklərdən keçib. Nardugan sözünün mənası isə, Nar - günəş, Dugan - doğan deməkdir. Yəni həmin gecədən sonra gündüzlər uzanar, gecələr qısalar, günəş yenidən doğar mənasına gəlir.

Qədim Türk xalçalarının üzərində də bəzənmiş yolka ağaclarına rast gəlinir.

Tanrıçılıqda (Tenqriçilik) Tanrının xüsusi köməkçiləri var ki, bunlar Xan adlandırılar. Bunlara Ayaz xan, Günəş xan, Dağ xan və sairəni misal çəkmək olar ki, öz kökənini Tanrıçılıqdan götürmüş İslam dini bu xanları mələklər adlandırıb.

Qədim Türk mifologiyasına görə həmin gecə Ayaz xan ( Ayaz ata, Şaxta baba) öz kisəsini hədiyyələrlə doldurar, alaçıqları gəzər, uşaqlara hədiyyə paylayar, alaçıq sahiblərinin Narduğan bayramını təbrik edər, bir qədəh kımız içər və gedərmiş.

Bəs bu bayram xristianlara necə keçmişdir, qısaca ona da bir açıqlama verək.

Narduğan bayramı ilk öncə Anadoluda, Qədim Romada qeyd edilməyə başlamışdır ki, romalılar da bunu Orta Asiyadan Anadoluya köç etmiş Hun türklərindən götürmüşlər. Həmin dövrdə Anadoluda yaşayan Əziz Nikolas adlı bir keşiş gecələr kasıb ailələrin evlərinin bacalarından onlara qızıl və ya gümüş pullar ataraq qaçıb gizlənirmiş. Bir ailənin də üç qızı olur və bunlar o qədər kasıb olurlar ki, atanın qızlara cehiz verməyə imkanı olmadığı üçün kimsə bu qızlarla evlənmirmiş. Bir gecə Əziz Nikolas həmin ailənin damına çıxar və bacadan üç kisə qızıl pul atar. Qızlar da həmin vaxtı öz corablarını yuyaraq qurumaq üçün sobanın yanından asmışmışlar. Əziz Nikolasın atdığı pul kisələri gəlib corabların içinə düşər. İndi xristianlarda yeni ildə evlərdən bəzəkli, yun corab asmaları da buradan götürülmüşdür. Zaman keçdikcə Əziz Nikolasın adına Santa Klaus demişlər.
Anadoludan sonra yeni il gecələrində yolka bəzəmək 16 - cı əsrdə ilk dəfə olaraq Almaniyada baş vermiş, daha sonra Fransa və ordan da bütün Avropaya yayılmışdır.

Odur ki, din adamlarının kafir, xristian bayramı adlandıraraq lənət oxuduqları yeni il, Narduğan bayramı biz Türklərin dədə - babamızdan qalmış müqəddəs bayramımızdır.

Əziz dostlar, bəylər, xatunlar, Narduğan bayramınız mübarək olsun. Tanrı yeni ildə hamımıza sağlam bədən, xoşbəxt ruh bəxş eləsin.
"AYMEDİACOMPANY.AZ"