Yaxın və Orta Şərq xalqları mədəniyyətinin maraqlı və zəngin hissəsini təşkil edən Azərbaycan miniatür sənəti dünya incəsənəti tarixində özünəməxsus yer tutur. Kitab illüstrasiyası kimi yaranıb formalaşan Azərbaycan miniatür məktəbi XIV əsrin ortalarında qrafik və boyakarlıq üslublarının uğurlu sintezindən doğan bədii üslub ortaya qoymağa başlayıb. Bu gün də bu qədim sənət yaşadılır, rəssamlarımız bir-birindən maraqlı əsərlər yaradırlar.
Təsadüfi deyil ki, Azərbaycan miniatür sənəti (müştərək nominasiya) UNESCO-nun Bəşəriyyətin Qeyri-Maddi Mədəni İrsinin Reprezentativ Siyahısına daxil edilib.
Baxış müxtəlifliyi ilə fərqlənən miniatür əsərləri və ənənə həvəskarlarını bir araya gətirmək məqsədilə Mədəniyyət Nazirliyi, Azərbaycan Rəssamlar İttifaqı və Dövlət Rəsm Qalereyasının dəstəyi ilə Xətai Sənət Mərkəzində "Miniatür əsərlər guşəsi" yaradılıb.
Guşədə müasir Azərbaycan rəssamlarının əsərləri ilə bərabər, Qacar, Təbriz, Moğol, Qaşqay, Herat, İsfahan və Səmərqənd miniatür məktəbi nümunələri də sərgilənir.
Xətai Sənət Mərkəzi “bir rəssamdan bir əsər” prinsipini əsas tutaraq guşəni daima yeniləməklə daha fərqi ekspozisiya yaratmağı qarşısına məqsəd qoyub.
Mərkəz rəngarəng və rəqabətə açıq çağdaş Azərbaycan miniatürü naminə bu janrda işləyən hər bir rəssamımızın yaradıcılığını bu guşədə görmək arzudadır.
