Azərbaycanın telekommunikasiya və poçt xidmətləri üzrə tənzimləyici qurumu
İnformasiya Kommunikasiya Texnologiyaları Agentliyi (İKTA) ölkəmizdə internet
telekommunikasiya xidməti sahəsində tənzimləyici çərçivənin hazırlıq səviyyəsini
yenidən təhlil edib. Əvvəlki ildə olduğu kimi, təhlilin aparılmasında bir sıra beynəlxalq
reytinq cədvəllərinin indikatorlarından istifadə edilməklə 60 sual araşdırılıb.
Yenilənmiş təhlillərin aparılmasına səbəb bir sıra beynəlxalq reytinq cədvəllərində
göstərilən indikatorlar üzrə müəyyən edilən suallarda dəyişikliyin olmasıdır.
Bu səbəbdən təhlildə hər bir sual üzrə onun əhatəolunma vəziyyəti yenidən
qiymətləndirilib və qiymətləndirilmədə istifadə olunmuş mənbələr qanunvericiliyə uyğun
olaraq təkmilləşdirilib. Cədvəlin hazırlanmasında məqsəd ölkəmizdə internet
telekommunikasiya xidməti sahəsinin tənzimləyici çərçivəsinin mövcud statusu barədə
geniş auditoriyanın məlumatlandırılması və maarifləndirilməsində etibarlı mənbələrə
əlçatanlığını təmin etməkdir. Yenilənmiş təhlil müvafiq predmet üzrə biznes bələdçisi
kimi istifadə imkanı yaradır.
İKTA rəsmi saytında yerləşdirilən təhlil ətrafında təkliflərə və müzakirələrə tam açıq
olduğunu bəyan edir.
Qeyd edək ki, İnformasiya Kommunikasiya Texnologiyaları Agentliyi ölkədə informasiya-
kommunikasiya texnologiyaları və rabitə (telekommunikasiya və poçt) sahələrində
tənzimləmə və nəzarəti, eləcə də radiospektr idarəçiliyini həyata keçirir.