İyulun 28-də “Savalan” Tarixi Araşdırmalar İctimai Birliyi Azərbaycan Respublikası Qeyri-hökumət Təşkilatlarına Dəstək Agentliyinin maliyyə yardımı ilə “Zəngəzur dəhlizi. Müasirlik tarixi kontekstdə” layihəsi çərçivəsində Cəfər Cabbarlı adına Respublika Gənclər Kitabxanasında dəyirmi masa keçirib. Konfransda AMEA Fəlsəfə və Sosiologiya İnstitutunun Türk xalqlarının fəlsəfi fikir tarixi və müasir fəlsəfəsi şöbəsinin müdiri, fəlsəfə üzrə fəlsəfə doktoru, dosent Faiq Ələkbərli “Zəngəzur dəhlizi və Türk dünyasının gələcəyi” mövzusunda məruzə edib. O, məruzəsində Zəngəzur probleminin tarixi-mədəni və fəlsəfi mahiyyətindən bəhs edib. Onun sözlərinə görə, vaxtilə Qərbi Zəngəzurun Azərbaycanın əsas hissəsindən zorla çıxarılaraq Ermənistana birləşdirilməsi Türk dünyasını zəiflətmək üçün baş verib. Ancaq hazırkı vəziyyətdə Azərbaycan Zəngəzur dəhlizi problemini həll edərək Türk dünyası üçün yeni bir üfüq açacaqdır.