20 Yanvar faciəsinin 35-ci ildönümü münasibətilə İsmayıllı şəhər 3 nömrəli məktəb-liseydə şeirlərin bədii qiraəti müsabiqəsi keçirilib.
Tədbir Azərbaycanın ərazi bütövlüyü uğrunda canından keçmiş şəhidlərin əziz xatirəsinin bir dəqiqəlik sükutla yad edilməsi ilə başlayıb. Ardınca Dövlət Himni səsləndirilib.
Müsabiqədə rayonun şəhər və kənd ümumtəhsil məktəblərini təmsil edən 20-dən çox şagird iştirak edərək 20 Yanvar faciəsinə həsr olunmuş şeirləri bədii qiraətlə təqdim edib. İştirakçıların çıxışları münsiflər heyəti tərəfindən ifadəlilik, səhnə mədəniyyəti və bədii təqdimat meyarları əsasında qiymətləndirilib.
Münsiflər heyətində rayonun tanınmış söz adamları, “İsmayıllı Yazarları” ədəbi-ictimai birliyinin üzvləri də təmsil olunublar.
Tədbirin sonunda bədii qiraət müsabiqəsinin qalibləri, eləcə də 20 Yanvar faciəsinə həsr olunmuş rəsm və esse müsabiqələrində fərqlənən şagirdlər Fəxri fərmanlar və qiymətli hədiyyələrlə mükafatlandırılıblar.
Çıxış edənlər 20 Yanvar faciəsinin Azərbaycan xalqının azadlıq və müstəqillik uğrunda mübarizə əzmini daha da gücləndirdiyini vurğulayaraq, həmin hadisələrin sonradan qazanılan tarixi Zəfərin və 44 günlük Vətən müharibəsində əldə olunan Qələbənin mənəvi-siyasi təməllərindən biri olduğunu bildiriblər.
