Azərbaycan və Özbəkistan arasında dostluq, qardaşlıq və mədəni əlaqələr ildən-ilə daha da möhkəmlənir. Bu istiqamətdə həyata keçirilən layihələr, qarşılıqlı ədəbi əməkdaşlıq və yaradıcılıq mübadiləsi iki qardaş xalqın mənəvi bağlarının güclənməsinə mühüm töhfə verir. Bu prosesdə “İsmayıllı Yazarları” Ədəbi-ictimai Birliyinin sədri, şair-tərcüməçi *Şahməmməd Dağlaroğlu (Soltanov)*nun fəaliyyəti xüsusi diqqət çəkir.
Məhz bu əməkdaşlığın növbəti nümunəsi olaraq, 2 iyul 2025-ci il tarixində Azərbaycan Milli Elmlər Akademiyasında (AMEA) Özbəkistan Beynəlxalq Ədəbiyyat, Mədəniyyət, İncəsənət və İctimai Elmlər Akademiyasının nümayəndə heyəti ilə görüş keçirilib.
Səmimi dostluq və qardaşlıq şəraitində baş tutan görüşdə AMEA-nın prezidenti, akademik İsa Həbibbəyli Azərbaycan ilə Özbəkistan arasında tarixi dostluq münasibətlərindən, ortaq mədəni dəyərlərdən və bu əməkdaşlığın perspektivlərindən ətraflı bəhs edib. Görüş zamanı tərəflər elmi və ədəbi əlaqələrin daha da genişləndirilməsinin vacibliyini vurğulayıb, əməkdaşlığın inkişafına dair ikitərəfli saziş imzalayıblar.
Özbəkistan Beynəlxalq Ədəbiyyat, Mədəniyyət, İncəsənət və İctimai Elmlər Akademiyasının prezidenti, şair-jurnalist Abdulla Minqabilov Şahməmməd Dağlaroğlunun tərcüməsində Azərbaycanda nəşr olunmuş “Məhəbbət simfoniyası” kitabını Akademiyanın kitabxanasına və görüş iştirakçılarına hədiyyə edib.
Tədbir çərçivəsində akademik İsa Həbibbəyliyə Özbəkistan Beynəlxalq Ədəbiyyat, Mədəniyyət, İncəsənət və İctimai Elmlər Akademiyasının həqiqi üzvü vəsiqəsi və medalı da təqdim olunub.
Səmimi və işgüzar şəraitdə keçən görüş xatirə fotosunun çəkilməsi ilə başa çatıb və iştirakçılar tərəfindən Azərbaycan–Özbəkistan dostluq münasibətlərinin inkişafına mühüm töhfə kimi dəyərləndirilib.
