Gənclərin İnkişaf və Karyera Mərkəzinin Dağlıq Şirvan Regional Nümayəndəliyinin İsmayıllı bölməsinin bir qrup könüllüsü “Peşəkar kadr” layihəsi çərçivəsində “İsmayıllı Yazarları” ədəbi-ictimai birliyinin ofisində olublar.
Könüllülər “İsmayıllı Yazarları” ədəbi-ictimai birliyinin sədri Şahməmməd (Dağlaroğlu) Soltanov ilə görüşərək onun həyat və yaradıcılığı ilə yaxından tanış olublar.
Qonaqları səmimiyyətlə qarşılayan Şahməmməd Soltanov əvvəlcə öz fəaliyyəti, jurnalistika sahəsində qazandığı təcrübə və ədəbi yaradıcılığı barədə ətraflı məlumat verib. Səmimi söhbət şəraitində keçən görüş zamanı o, gəncləri maraqlandıran sualları cavablandırıb, peşə seçimi, yaradıcılıq və şəxsi inkişafla bağlı dəyərli fikirlərini bölüşüb.
Görüşdə iştirakçılar “İsmayıllı Yazarları” ədəbi-ictimai birliyinin fəaliyyəti ilə də maraqlanıblar. Onlara bildirilib ki, birliyə ədəbi yaradıcılıqla məşğul olan və yaradıcılıq potensialı ilə seçilən şəxslər üzv qəbul edilirlər.
Sonda şair görüşün fəal iştirakçılarına yenicə çapdan çıxmış “Sən yaşa, Azərbaycan” adlı şeirlər kitabını, eləcə də “İsmayıllı xəbərləri” qəzetinin son nömrələrini hədiyyə edib.
Gənclər görüşdən məmnun qaldıqlarını bildirərək təşkil olunan səmimi görüşə və dəyərli söhbətə görə təşəkkürlərini ifadə ediblər.
Leyla Ağamalızadə
